УИХ-ын чуулганы нэгдсэн хуралдаан 53.9 хувийн ирцтэй эхэллээ. Хуралдаанаар нийслэлийн албан татварын тухай хуулийн төслийг үргэлжлүүлэн хэлэлцэж байна.
Засгийн газраас өргөн мэдүүлсэн энэхүү хуулийн төслийг УИХ-ын Төсвийн байнгын хорооноос байгуулагдсан ажлын хэсэг ажиллаад архи, тамхи, согтууруулах төрлийн бүх ундааны борлуулалтад 1 хувийн татвар, баар, ресторан, амралтын газар, зочид буудалд үйлчлүүлэгчийн 1 хувийн татвар ногдуулахаар болгож зорилтот татвар болгон өөрчилсөн нь гишүүдийн дунд маргаан дагуулаад байгаа. Өчигдрийн хуралдаанд зарим гишүүд хуулийн төслийг татаж авах ёстой гэх байр суурийг илэрхийлж байсан юм. Мөн Ажлын хэсгээс гарсан эхний дөрвөн санал дэмжигдээгүй учир санал хураалгүй байнгын хороон дээр анхны хэлэлцүүлгийг дахин хийх санал гаргасан юм.
Ажлын хэсгийн гишүүн Д.Ганхуяг “Сонгууль арай болоогүй байна. Тангаргынхаа хүрээнд гишүүд үндсэн ажлаа хийгээчээ гэж хүсмээр байна. Засгийн ажил урагшлахаа болилоо. Ажлын хэсгээс гарсан саналууд унаж байгаа учир байнгын хороон дээр анхны хэлэлцүүлгийг хийх саналтай байна. Тиймээс хойшлуулж өгнө үү” гэсэн юм. Д.Ганхуяг гишүүний гаргасан энэхүү саналаар санал хураахад гишүүдийн олонх нь дэмжсэнээр хуулийн Төсвийн байнгын хороон дээр дахин хэлэлцэхээр боллоо.