Хан-Уул дүүргийн III хорооны иргэн Б.Мөнхтөр
Энэ намар “Тариалан эрхлэлтийг дэмжих сан”-гаас 11 трактор, тармууртай нь аваад Дорнод аймагт хадлангийн өвс бэлтгэхээр гарсан юм. Дорнод аймаг хадлан тэжээл бэлтгэх эх үүсвэрийн газар гэдгийг та бүхэн мэдэж байгаа. Хадлан хадаж үзье, хадлангийн бизнес хийвэл ямар бол гэж бодсон л доо. Өмнө нь ерөөсөө хадлан хадаж байгаагүй. Тэгээд орон нутгаас нь зөвшөөрөл аваад, төлбөр мөнгийг нь төлөөд, ажлаа эхлүүлсэн. Арвин хадлан бэлтгэж, 50 мянган тонн өвсийг хот руу тээвэрлээд, үлдэгдэл 20-иод мянган тонн өвс маань Дорнодод байгаа. Бэлтгэсэн хадлангаа хараахан борлуулж амжаагүй л байна. Дорнодод бол 2500-гаар хүмүүс авъя гэж байсан ч бизнес л юм чинь хот руу татвал илүү үнэ хүрэх болов уу гэж бодоод бэлтгэсэн хадлангаа хот руу татаад авчирсан юм. Замын зардалд багагүй хэмжээний мөнгө орсон болохоор өртөг нь нэмэгдсэн. Зах зээл дээр боодол өвс 5000-7000 төгрөгийн үнэтэй байгаа. Одоо ингээд заръя гэхээр надад ачааны машин, зөөх хүн хэрэгтэй болж байгаа юм л даа. Тийм болохоор мөнгөний бололцоо бас жаахан муу байна. Хураасан өвсөө зээлээр малчдад өгмөөр байна. Ингэхийн тулд Засгийн газраас өвсийг маань зээлээр өгөх ажлыг зохион байгуулж, дараа нь малчдыг мөнгөө төлөх боломжтой болсон үед нь үнийг нь олгохоор зохицуулалт хийж өгөхийг хүсч байна. Ингэж чадвал надад болон малчдад ч хэрэгтэй. Яагаад гэвэл би өвсөө нэг дор бөөнөөр нь зарж чадахгүй, малчид маань ч байнга бэлэн мөнгөөр өвс худалдаж авах боломж нь байгаа шүү дээ.
Хэлэх эрхийн индэрт оролцон үзэл бодлоо илэрхийлэхийг хүсвэл 95260351 дугаарын утсаар холбоо барина уу.