Баян-Өлгий аймгийн бүргэдчин охин Н.Айшолпан охины тухай “The Eagle Huntress” кино өнгөрсөн хоёрдугаар сард нээлтээ хийсэн билээ. Баримтат киноны нээлтэд Н.Айшолпан охин аав, ээжийн хамт очиж оролцсон юм. Тус киног олон улсад гаргах эрхийг “Sony Pictures” худалдан авсан бөгөөд ингэснээр “The Eagle Huntress” кино Австрали, Шинэ Зеланд, Латин Америк, Герман, түүнчлэн Ази, Скандинавын орны үзэгчдийн хүртээл болж буй.
Тэгвэл 13 настай бүргэдчин охин Айшолпаны амьдралаас сэдэвлэсэн тус кино Олон улсын Хэмптонсын кино наадамд түрүүлсэн тухай мэдээлэл цацагдаж эхэллээ. Тус наадамд түрүүлснээр “Бүргэдчин охин” кино Оскарын шилдэг гадаад киноны төрөлд нэр дэвших боломжтой болсон аж.
Үүний сацуу АНУ-ын “Harper’s Bazaar” сэтгүүлээс гаргасан 2016 оны эрэлхэг эмэгтэйчүүдийн нэгээр Н.Айшолпан охин тодорчээ. Уг жагсаалтад анх удаа монгол хүн багтаж байгаа нь энэ юм.