Оросын эртний эдлэл зардаг нэгэн сайтад БНМАУ-ын баатар цолны алтан таван хошуу тэмдгийг 49 мянган ам.доллараар худалдах зар гаргажээ. Дээрх зарлалд “Зах зээлд байхгүй онцгой ховор үнэ цэнэтэй эдлэл болох БНМАУ-ын баатар Сангийн Дампилын алтан таван хошуу тэмдгийг худалдана. Тэрээр Монгол ардын армийн хуягт бригадад цэргийн алба хааж, 1945 оны чөлөөлөх дайнд оролцон Жанчхүүгийн давааны их бэхлэлтийг сэтлэн давах ширүүн тулалдааны үед баатарлаг гавьяа байгуулж шагнуулж байв” хэмээн бичжээ.
ОХУ-ын зарын сайтад БНМАУ-ын баатар цолны алтан таван хошуу тэмдгээс гадна С.Дампилынх гэдгийг нотлох гэрчилгээний зургийг хавсарган тавьжээ. С.Дампил агсны БНМАУ-ын баатар цолны алтан таван хошуу тэмдгийг үнэ хаялцуулан худалдаж авахаар Ази, Европын орны олон хүн хандсан аж. Тэр дундаа онцгой ховор тэмдэг цуглуулах хоббитой хүмүүс дэлхийн өнцөг булан бүрээс холбогдож үнэ хаялцуулж эхэлжээ.
