Монгол Улсад суугаа болон хавсран суугаа гадаад улсын Дипломат төлөөлөгчийн газрын консулын ажилтнуудын ээлжит уулзалтыг ГХЯ-ны Консулын газар, Монголын Улаан Загалмай Нийгэмлэгтэй хамтран зохион байгуулав.
Тус уулзалтад ГХЯ, ОБЕГ, ГИХГ, ХНХЯ, ХХЕГ, УЕПГ, Дээд Шүүх, ЦЕГ, ОӨУБЕГ, ГЕГ, Хууль зүйн туслалцааны төв зэрэг 12 байгууллагын төлөөлөгчид илтгэл тавьж, консулын харилцаа, реадмисс, виз, оршин суух бүртгэл, Монгол Улсад хөдөлмөр эрхлэх, гамшгийн аюулаас урьдчилан сэргийлэх, эрхийн туслалцаа үзүүлэх, гадаадын иргэдийг халдлагаас хамгаалах гэх мэт онцлог асуудлаар санал солилцов. Мөн АНУ-ын ЭСЯ-ны консул Б. Лаптон “ Хариуцлагатай аялал” аян болон Монгол Улсад АНУ-ын виз олгох туршалгаасаа мэдээлэл хийж, Канад Улсын ЭСЯ-ны консулын ажилтан У. Ариунаа “ Дэлхийн консулын форум”-ын талаар танилцуулав.
Энэ удаагийн уулзалтад Улаанбаатар хотод суугаа гадаадын 11 улсын, Бээжин хотод суугаа 11 улсын, Сөүл хотод суугаа нэг улсын ЭСЯ-ны консул дипломатууд болон нэг олон улсын байгууллагын төлөөлөгч оролцов. Энэхүү арга хэмжээ нь Монгол Улсыг хариуцан ажиллаж байгаа дипломат, консулын ажилтан нарын хооронд ажил хэргийн холбоо тогтоох, мэдээлэл туршлага солилцох, Монгол Улсын хууль тогтоомж, төрийн байгууллагын үйл ажиллагаатай танилцахад ихээхэн ач холбогдолтой байснаараа онцлог байв.