УИХ-ын чуулганы өнөөдрийн хуралдаанаар Засгийн газраас өргөн мэдүүлсэн Уул уурхайн бүтээгдэхүүний биржийн тухай хуулийн төсөл болон хамт өргөн мэдүүлсэн хуулийн төслүүдийн эцсийн хэлэлцүүлгийг хийлээ.
Сүүлийн жилүүдэд уул уурхай, олборлох салбар өндөр хурдацтай хөгжиж, экспортын 94 хувийг тус салбар эзэлж буй. Энэ агуулгаараа уул уурхайн салбараас хүртэх орлогыг ил тод, хамгийн боломжит үнээр төвлөрүүлэх нь чухалд тооцогдож байгаа юм. Гэтэл уул уурхайн бүтээгдэхүүний зах зээлийн бодит үнэ, худалдааны нөхцөл, бүтээгдэхүүний чанарын талаарх мэдээлэл нээлттэй, ил тод бус байдгаас үр ашигтай гэрээ хэлцэл хийх боломж тааруу, зардал өндөр, борлуулалтын зохион байгуулалттай зах зээл бий болоогүйгээс бүтээгдэхүүний үнэ ханш дэлхийн зах зээлийн үнээс үлэмж доогуур байсаар байна. Иймд уг хуулийн төсөлд уул уурхайн бүтээгдэхүүний бирж байгуулах асуудал болон түүнтэй холбоотой харилцааг тусгажээ.
Хуулийн төсөл батлагдсанаар Монгол Улсад уул уурхайн бүтээгдэхүүний бирж байгуулах эрх зүйн орчин бүрдэж, улмаар нийлүүлэгч, худалдан авагч хоёр талыг холбосон найдвартай тогтолцоо бий болж, зах зээлийн бодитой ханш тогтох, арилжааны болон гэрээ, хэлцлийн мэдээлэл олон улсын зах зээлд нээлттэй зарлагдсанаар хөрөнгө оруулагчид найдвартай мэдээллээр хангагдах, улмаар манай улсын уул уурхайн бүтээгдэхүүний өрсөлдөх чадвар нэмэгдэх аж.
Чуулганы хуралдааны үеэр үг хэлсэн гишүүдийн дийлэнх нь “Эрдэнэс Тавантолгой” ХК-ийн нийт хувьцааны 20 хувь болох 1072 хувьцааны ноогдол ашгийг иргэдэд тараадаг байх нь зүйтэй гэсэн байр сууриа илэрхийлж байв. Уул уурхай, хүнд үйлдвэрийн сайд Ж.Ганбаатар гишүүдийн асуултад хариулахдаа дээрх байр суурьтай санал нэг байгаагаа хэлсэн. Ингэхдээ “Эрдэнэс тавантолгой” компанийг үр ашигтай ажиллуулах үүднээс Бүрэн эрхт төлөөлөгч томилон ажиллуулж байна. Цаашид тус компанийн олборлож буй нүүрсний 30 хүртэлх хувийг цахим биржээр борлуулах ажлыг туршилтаар гүйцэтгэнэ. Ирэх хоёрдугаар сарын нэгнээс 10 хувь, долдугаар сарын нэгнээс 30 хүртэлх хувийг шинэ биржээр худалдан борлуулах чигтэй ажиллаж байна гэсэн тайлбарыг хийсэн. Зарим гишүүдийн хувьд энэхүү хуулийн төслийг дэмжиж байгаа ч уул уурхай, хөдөө аж ахуй гэхчлэн олон төрлийн бирж байгуулах шаардлагагүй. Зөвхөн Монголын Хөрөнгийн бирж дээрээ бүгдийг нь төвлөрүүлэх нь зүйтэй хэмээн үзэж байгаагаа хэлж байв.