Мэргэжлийн хяналтын ерөнхий газрын дэд дарга Б.Бат-Эрдэнэ 2015.07.31-ний өдөр БНСУ-ын Уул урхайн нөхөн сэргээлтийн корпораци /Миреко/-ийн Гадаад харилцаа, хамтын ажиллагааны албаны дарга Пэг Син Гвон тэргүүтэй төлөөлөгчдийг хүлээн авч уулзан харилцаа, хамтын ажиллагааны талаар санал солилцов.
БНСУ-ын Койка байгууллагын 5,800,000 ам.долларын санхүүжилтээр Миреко байгууллага “Монгол Улсын уул уурхайн бохирдлын хяналтын мастер төлөвлөгөө боловсруулах, салбарын чадавхийг бэхжүүлэх” төслийг БОНХАЖЯ-нд хэрэгжүүлэх гэж байна.
Энэ хүрээнд уул уурхайн холбогдолтой хууль, дүрэм, журам, стандартыг хамтарч боловсруулах, төслийн Зөвлөлийн багт төлөөллөө оролцуулахыг Мирекогийн тал Мэргэжлийн хяналтын ерөнхий газраас хүслээ.
Мэргэжлийн хяналтын байгууллага 2009 оноос хойш Мирекотой хамтран үр дүнтэй цөөнгүй ажил хийж байгааг дэд дарга Б.Бат-Эрдэнэ хэлээд одоо хэрэгжүүлэх төсөл Монгол Улсад нэн хэрэгтэй гэдгийг тэмдэглэв.
“Монгол Улсын уул уурхайн бохирдлын хяналтын мастер төлөвлөгөө боловсруулах, салбарын чадавхийг бэхжүүлэх” төслийн хэрэгжилтэд Койка байгууллага ерөнхий хяналт тавьж, технологи сургалтын төвийн барилга барих бол Миреко мастер төлөвлөгөө боловсруулж, сургалтын хөтөлбөр хэрэгжүүлэн, туршилтын нөхөн сэргээлт хийх юм.