Өнгөрсөн баасан гаригийн 14.20 цагт Сөүлээс Улаанбаатарын чиглэлд ниссэн МИАТ компанийн ОМ302 аяллын дугаартай “Боинг 767” онгоц агаарт хөөрөөд цаг орчим болсоны дараа урд талын бүхээгний дээд талаас утаа гарч, зорчигчдыг нэлээд сандаргасан гэнэ. Нисэх багийнхан “Гэмтэл үндсэн эд ангид нөлөөлөөгүй болохоор аюулгүй” гээд нислэгээ үргэлжлүүлсэн байна. Нислэгийн үеэр ямар гэмтлийн талаар МИАТ компанийн дэд захирал Б.Ганболд “Техникийн дутагдлаас болж нислэгийн үед цахилгааны гэмтэл гарчээ. “Боинг 767” онгоцонд энтертайнмент системийн гурван проектор байдаг. Голын проекторт цахилгааны гэмтэл гарч, утаа гарсан. Нисэх багийнхан шуурхай арга хэмжээ авч цахилгааныг салгасан байна. Энэ гэмтэл нь нислэгт шууд нөлөөлөхөөргүй байсан тул аяллаа үргэлжлүүлжээ. Онгоц газардсны дараа бид проекторийн тэжээлийг салгасан. Гэмтэлийг шалгаад проекторийг солих шаардлагатай байсан тул шинийг захисан. Шинэ проектор иртэл голын проекторийн тэжээлгүй нислэг үйлдэх учир ахин ийм гэмтэл гарахгүй” гэж ярьжээ.