Хүн бүр хуульч байх шаардлагагүй. Харин хуулийн наад захын мэдлэгтэй болмоор юм байна. “Таван сая фунт хожлоо” гэсэн захидал хүлээж авсан залуу 50 сая төгрөгөөрөө хохирсон талаар “Өдрийн сонин”-д ярилцлага өгсөн. Цаад нөхөр нь үнэмшил төрүүлэхүйц баримт харуулчихаад л татвар болох арван хувь, банкны данс нээх мянган фунт, банкны шимтгэл 12 мянган фунт явуул гэх мэтээр захидал илгээж мөнгө аваад байсан гэдэг. Хохирогч орлогоос нь татвар, шимтгэлийг суутгаад авдгийг мэдсэн бол юу гэж 50 сая төгрөгөө алдах билээ. Манай хуульд ч ингээд заачихсан байдаг. Дэлгүүрийн азтанаар шалгараад хожсон мөнгөө авахад арван хувийг нь татварт суутгаад авчихсан байдаг шүү дээ. Байгууллагаасаа 300 мянган төгрөгөөр шагнуулсан бол 270 мянга нь гар дээр нь ирдэг. Ийм энгийн зүйлийг анзаардаггүй, мэддэггүйгээсээ бусдад олз болж байна. Бас цаадах нөхдүүд “Шаардсан мөнгийг хугацаанд нь шилжүүлэхгүй бол Олон улсын шүүхэд хандана” гэж айлгадаг. Эх орондоо байгаа хүнийг гадаадын хуулийн байгууллага шалгах, байцаах бол эхлээд тухайн улсын хуулийн байгууллагаас албан ёсоор зөвшөөрөл авдаг. Өөрөөр хэлбэл, эхлээд манай улсын хуулийн байгууллага иргэнээ дуудаж асуудлыг тодруулдаг. Энэ мэт энгийн зүйлсийг мэдмээр юм байна шүү.
Б.ЦЭЦЭГДЭЛГЭР