Үндэсний Статистикийн Хороо энэ онд зохион байгуулсан 10 жилд нэг удаа явуулдаг Хөдөө аж ахуйн тооллогод 100 хувь таблет ашиглахыг зорьж, үүний үр дүнд цаасан маягт хэвлэх болон мэдээллийг шивэх ажлын зардал болох нийт 800 сая төгрөг хэмнэсэн байна.
Таблет ашигласнаар цаасаар цуглуулсан мэдээллийг компьютерт оруулах гэж цаг үрэхгүй, судалгаанд тухайн сонгогдсон өрх хамрагдаж байгаа эсэхийг gps-ээр хянах, таблетэд оруулж буй мэдээлэлд алдааны шалгалт газар дээр нь хийх зэрэг олон давуу талтай. Ирэх оноос Швед, Австралийн жишгээр түүвэр судалгаанд хамрагдсан өрх мэдээллээ цахим хуудас ашиглан өгч болдог байх сонголтыг нэвтрүүлэхээр зорьж байгаа талаар тус хорооны дарга Б.Батдаваа хэллээ.
Үндэсний Статистикийн Хороо нь Монгол Улсын 21 аймгийн өнцөг булан бүрт хүрч ажиллах шаардлагатай байдаг учраас энэ оноос эхлэн автомашин, тоног төхөөрөмжүүдээ GPS системд холбосон байна.
21 аймагт байгаа статистикийн хэлтсүүд сард дунджаар 2000-3000 км зам туулж, ойролцоогоор аймаг тус бүр 250 айл, өрхөөс судалгааны мэдээлэл цуглуулдаг. Автомашин, тоног төхөөрөмжиндөө GPS байршил заагч суурилуулж, статитистикийн таних тэмдэгтэй болгожээ. Ингэснээр хөдөө хээр утасны сүлжээгүй газар явах тохиолдолд ажилчдын аюулгүй байдлыг хангахын зэрэгцээ статистик мэдээллийг заасан байршлаас цуглуулж технологийн давуу талыг ашиглах боломж бүрдэж байгаа аж.