Фэйсбүүкийг үүсгэн байгуулагч Марк Зукерберг энэ зууны төгсгөл гэхэд халдварт өвчнийг үндсээр нь арчих хүсэлтэй байдгаа дэлхий нийттэй хуваалцлаа.
Тэрбумтан CEO болон түүний эхнэр Приссилла Чан нар дээрх зорилгынхоо хүрээнд ирэх 10 жилийн хугацаанд 3 тэрбум ам.долларыг халдварт өвчний эсрэг үйл ажиллагаанд зарцуулна гэдгээ өнөөдөр мэдэгдэв.
Тэдний эхний ээлжинд 600 сая ам.долларыг Сан Франциско хотын Калифорнийн их сургуульд шинэ судалгааны төв байгуулахад зориулах аж. Дээрх судалгааны төв нь Калифорни, Беркели, Станфордын их сургуулиудтай хамтран ажиллах юм байна.
Зукерберг хэлэхдээ,
“Халварт өвчнийг үгүй болгоход тодорхой хугацаа зарцуулагдах боловч эхний алхмаа хийж байна. Хамгийн гол нь бид тэвчээртэй байх хэрэгтэй” гэв.
Зукерберг болон Чан нь “The Giving Pledge”-ийг санаачилсан хүмүүсийн нэг бөгөөд тус санд Билл болон Мелинда Гэйтс, Варрен Буффэт, Элон Муск, Ричард болон Жоан Брансон нарын тэрбумтнууд нэгдэж, хөрөнгийнхөө тал хувийг буяны үйлсэд хандивлахаар болсон байна. Харин Зукербэрг болон түүний эхнэрийн хувьд хөрөнгийнхөө 99 хувийг хандивлах амлалт өгөөд байгаа билээ.