Өнгөрсөн даваа гаригийн орой Германы нийслэл Берлин хотын баруун хэсэгт орших Брайтшайдплац талбай орчимд байрлах худалдааны захад ачааны машинтай этгээд дайран орсны улмаас 12 хүн амиа алдаж, 48 хүн хүнд бэртэж, эмнэлэгт хүргэгдсэн билээ.
Тус улсын тагнуулын албанаас мэдэгдсэнээр, албаны хүмүүс уг ослыг террорист халдлага гэж дүгнэжээ. Гэмт этгээдийг баривчлан саатуулсан, ачааны машин нь Польшийн улсын дугаартай байсныг Германы Цагдаагийн газрын хэвлэлийн төлөөлөгч Керстин Цьесмар мэдэгдэв.
Ган төмөр тээвэрлэж явсан машин хулгайлагдсан байж болзошгүй талаар тухайн ачааны машиныг хариуцдаг оператор компанийн эзэн Арьел Цуравски цагдаад мэдээлэл өгчээ. Гэрчүүдийн яриагаар ачааны машин хурдаа сааруулалгүйгээр явган хүний замаар явж, шууд худалдааны захын шилэн цонхыг дайрч орсон бөгөөд 60 км/цаг орчим хурдтай явж байжээ.
“Лалын улс” алан хядах бүлэглэлээс Берлин хотноо Зул сарын баярын үзэсгэлэн яармаг сонирхохоор очсон хүмүүсийг ачааны автомашинаар дайрч, олон хүний аминд хүрсэн халдлагыг үйлдсэн хэмээн мэдэгджээ. Баривчлагдсан этгээд Пакистанаас дүрвэж, энэ оны хоёрдугаар сарын 16-нд Германд орж иржээ.
Энэ оны долдугаар сарын 15-нд Францын Ницца хотод мөн төстэй халдлага гарч байсан билээ. Тухайн үед Бастилийн чөлөөлсний баяр тэмдэглэж байсан хотын голын эрэг дагуу цугласан олныг ачааны тэрэг дайрч, 86 хүний аминд хүрч, 308 хүн бэртэж шархадсан бөгөөд мөн л “Лалын улс” үйлдсэнээ мэдэгдэж байв.