АНУ-ын найруулагч, продюсер Дэмьен Шазелийн 2016 онд бүтээсэн Оскарын шагналт “Lala Land” киноноос сэдэвлэсэн балетын бүжгэн жүжиг тун удахгүй үзэгчдийн хүртээл болох гэж байна.
Тус бүжгэн жүжгийг монгол найруулагч дэглэн найруулж байгаагаас гадна арт, холограм, драмыг хослуулж байгаа аж.
“Lala Land” кино нь үгээр илэрхийлж боломгүй мэдрэмжийг дуу, хөгжим, жүжиглэлтээр дамжуулан хүргэж чадсан дэлхийн мюзикл кинонууд дундаа өндөр үнэлгээтэй бүтээл юм. Солонгос улсад үйл ажиллагаа явуулдаг “Elite ballet” компани санаачлан балетын урлагийг, медиа урлагтай хослуулан цоо шинэ хувилбараар “Lala Land” балетын бүжгэн жүжгийг Монголын тайзнаа амилуулах гэж байна.
Тодруулбал, тус балетын бүжгэн жүжгийн хөгжмүүдийг хөгжмийн найруулагч, продюсер Одбаяр шинэчлэн найруулж, балетын найруулагч бүжиг дэглээч Ц. Цолмонбуд балетын шинэ бүжгийн тавилтыг дэглэжээ. Мөн Монгол, Япон, Солонгос улсын шилдэг балетын гоцлооч нар хамтран медиа арт, холограм, драмыг хослуулан хүргэх аж.
“Elite balet” компанийн захирал балетчин, найруулагч Ц. Цолмонбудын хувьд өнгөрсөн онд солонгос улсад анх удаа бүрэн хэмжээний балетын бүжгэн жүжгийг дэглэн найруулсан анхны монгол уран бүтээлч юм. Тус тоглолт нь монгол хүний дэглэлт, найруулгатай анхны мюзикл балет бөгөөд балетын бүжгэн жүжгийн тоглолтод дуучин Ука дуулахаас гадна, балетийн бүжигчний дүр бүтээх аж.
Бүжгэн жүжгийг зургаадугаар сарын 25,26-нд “The Corporate Hotel and Convention Centre”-д тоглоно.