АН-аас өнөөдөр мэдээлэл хийлээ. АН-ын Гүйцэтгэх нарийн бичгийн дарга асан Л.Эрхэмбаяр, Хэнтий аймгийн засаг дарга асан Ж.Оюунбаатар нар оролцож намын Их хурлын талаарх мэдээлэл болон АН-ын даргын сонгуулийн талаар сэтгүүлчдийн сонирхсон асуултад хариуллаа.
АН-ын Гүйцэтгэх нарийн бичгийн дарга асан Л.Эрхэмбаяр: Ардчилсан нам анх удаагаа бүх гишүүдийн саналаар намын даргаа сонгохоор боллоо. Нэгдүгээр сарын 10 хүртэл манай нам шинэчилсэн гишүүний бүртгэлээ хийнэ. 2016 оныхоо намын гишүүний татвараа төлсөн хүн бол манай намын гишүүн байна гэж дүрмэндээ тодорхой тусгаж өөрчлөлт оруулсан. Сонгуулийн хорооны даргаар Ж.Оюунбаатар ажиллана.
АН-ын Их хурлаар 12 сарын 17-ныг хүртэл АН-ын даргын сонгуульд нэр дэвших ажиллагаа эхэлнэ. Ингээд нэг дүгээр сарын 29-ны өдөр сонгууль болно. Манай намын Их хурал 3-р сард дахин болно.
Намын дарга болсон хүн бол Ерөнхий сайд болно. Ерөнхийлөгчид нэр дэвшихгүй. Намын дэд даргатай болох дүрмийн асуудал яригдаж байгаа.
Л.Гүндалайгийн АН-д элсэх тухай хүсэлт гаргасан тухай асуухад, Л.Гүндалай бол өөр намын дарга. Албан ёсоор намын даргаа өгөөгүй байгаа учир манай намд элсэх эсэх нь тодорхойгүй хэмээлээ.
О.ӨНӨР