2016 оны Нобелийн энх тайвны шагналыг Колумбын ерөнхийлөгч Хуан Мануэль Сантос хүртлээ. Нобелийн хорооноос түүнийг эх орондоо 52 жил үргэлжилсэн иргэний дайны төгсгөлийг авчрахад оруулсан хувь нэмрийг нь үнэлж ийнхүү шагнажээ. Тэрээр Фарк хэмээх хувьсгалт зэвсэгт бүлэглэлийнхэнтэй энхийн гэрээ байгуулсанаар сүүлийн хагас зуун жин үргэлжилсэн иргэний дайн дуусгавар болсон юм.
Өнгөрсөн хагас зуун жил үргэлжилсэн иргэний дайны улмаас нийт 200 гаруй мянган хүн амь үрэгдсэн юм. Өнгөрөгч Бямба гарагт Норвеги улсын нийслэл Осло хотноо ерөнхийлөгч Сантост энэхүү алдар хүндтэй шагналыг гардуулах ёслолын ажиллагаа боллоо. Шагнал гардуулах ёслолын ажиллагааны үеэр Норвегийн Нобелийн хорооны орлог дарга ерөнхийлөгч Сантост энх тайвны медаль болон гэрчилгээг нь гардуулан өгсөн юм.
Ерөнхийлөгч Хуан Мануэль Сантос нь өнгөрөгч 2010 оноос хойш Колумын ерөнхийлөгчөөр сонгогдож, эх орноо удирдаж байгаа юм. Харин үүнээс өмнө тэрээр, тус улсын гадаад худалдааны сайд, сангийн сайд, үндэсний батлан хамгаалахын сайдын албыг хашиж байсан байна.