Өнөөдөр “Хуралдай наадам” шонхорын баярын арга хэмжээг “Чингис Хааны Хүрээ” аялал жуулчлалын цогцолборт зохион байгуулж байна.
Монголчууд эрт дээр үеэс эхлэн шонхор шувууг туг сүлдэндээ тахин шүтэж, ахуй амьдралдаа гаршуулан, түүгээр ан ав хийж байсан түүхэн уламжлалтай. Шувуулахуй нь Юнескогийн Боловсрол, Соёл, Шинжлэх ухааны хэлтсээс Хүн Төрөлхтний Биет бус соёлын өвийн жагсаалтад 2009 оны 12-р сарын 21-ний өдөр бүртгэгдсэн байдаг.
Эртний Монголын түүх, соёлтой шууд холбогддог үндэсний бахархалт шонхор шувууны талаар олон нийтэд сурталчлан таниулах, шонхорын наадгайг Аялал жуулчлалын шинэ бүтээгдэхүүн болгох, биет бус соёлын өвийг сэргээх зорилгоор “Цагаан Шонхор Гэрэгэ” ТББ, Монгол шувуулахуйн клуб, Монголын этноспортын холбоо, Монголын шувуулахуйн холбоо зэрэг холбогдох байгууллагуудтай хамтран зохион байгуулж байна.
“Хуралдайн наадам” шонхорын баярын хөтөлбөрт:
- Морь харвааны тэмцээн
- Шонхор шувуу, Тайга ноход, Морьт харваачдын парад
- Ардын урлагийн их театрын тоглолт
- Морьтны гайхамшигт шоу тоглолт
- Шонхор шувууны үзүүлбэр, тэмцээн
- Шонхор шувуугаар хиймэл ан бариулах үзүүлбэр
- Агаарт нисэх, олз бариулах үзүүлбэр зэрэг багтаж байна.