“Зам барилгын хүртээмжид хийх хөгжлийн бэрхшээлтэй иргэдийн үнэлгээ-2014” аяныг зохион байгуулж байна. Энэ аянаар төрийн байгууллагууд, нийгмийн үйлчилгээний салбарт баригдсан барилга байгууламжид явган хүний зам, гүүрэн гарцаар хөгжлийн бэрхшээлтэй иргэд саадгүй зорчих боломж бүрдсэн эсэх талаарх үнэлэлт дүгнэлтийг энэ сарын 14-20 ны өдрийн хооронд хийх аж.ХБИ –д зориулсан “Иргэний барилгын төлөвлөлтөд хөдөлгөөний хязгаарлалттай иргэдийн шаардлагыг тооцсон орон зайн орчин, үндсэн шаардлага 6055-2009”, “Авто замын байгууламж, явган хүний зам хөдөлгөөний бэрхшээлтэй хүмүүст зориулсан зам Техникийн шаардлага MNS 5826-2006 болон зааврын талаар MNS 6056-2009” гэсэн гурван стандарт манай улсад хэрэгждэг аж. Хөгжлийн бэрхшээлтэй иргэд тус аяныг зохион байгуулахдаа дээрх стандарт үзүүлэлтүүдийн дагуу үнэлгээний хуудас ашиглан, сонгон авсан зам барилгууд дээр нэг бүрчлэн хэмжилт хийж, стандартын хэрэгжилт ямар байгааг дүгнэн гаргаж, зөрчилтэй барилга байгууламжуудыг тодруулан гаргаж дээрх стандартыг баримтлан ажилладаг байх талаар зөвшилцөх аж. Мөн хөгжлийн бэрхшээлтэй иргэд бодитоор явж үзэн, бэрхшээл байгаа эсэхэд үнэлэлт дүгнэлт өгөх юм байна. Энэхүү үнэлгээний аяныг Монголын тэргэнцэртэй иргэдийн холбооны гишүүд явуулж байгаа юм.
З.Батхуяг