Цаг агаарын онц аюултай үзэгдлийн улмаас Өмнөговь аймагт цахилгаан эрчим хүч тасалдсан байна.
Тодруулбал, энэ сарын 9-10-нд шилжих шөнө Өмнөговь аймгийн Булган, Гурвантэс, Цогт-Овоо, Мандал-Овоо, Баян-Овоо, Номгон, Манлай сумын нутгаар салхи секундэд 13-18 метр хүрч шороон шуурга шуурчээ.
Мөн Дундговь аймгийн төв болон Сайнцагаан суманд салхи секундэд 25 метр, зарим үед 34 метр секунд бусад сумдын нутгаар 16-21 м/с, түр зуур 20-26 м/с болж цаг агаарын онц аюултай хэмжээнд хүрсэн юм.
Цаг агаарын энэхүү онц аюултай үзэгдлийн улмаас Цахилгаан Дамжуулах Үндэсний Сүлжээ(ЦДҮС) ТӨХК Говийн бүсийн салбарын 220 кВ-ын Мандалговь-Тавантолгой чиглэлийн цахилгаан дамжуулах агаарын шугамын үзлэгээр 220кВ дундын 32 дугаар тулгуурт гэмтэл гарсан. Иймд ЦДҮС ТӨХК-ийн засварын бригад Улаанбаатар хотоос очиж ажиллаж байгааг Өмнөговь аймгийн Засаг даргын Тамгын газраас мэдээлэв.
Гэмтлийг арилгах ажил өглөөний 06:00 цагаас эхэлсэн бөгөөд 36 цагийн дотор гэмтлийг бүрэн арилгахаар ажиллаж байна. Өмнөговь аймгийн баруун гурван сумаас бусад хэрэглэгчийн цахилгаан эрчим хүч дээрх гэмтлийн улмаас тасарсан тухай аймгийн Засаг дарга нь өөрийн цахим хуудсандаа бичсэн байна.
Мөн аймгийн Засаг даргын Тамгын газраас өгсөн мэдээллээр, Ухаа Худаг ДЦС, Даланзадгадын ДЦС-аас Даланзадгад, Номгон, Хүрмэн, Баяндалай, Булган, Ханхонгор сумын хэрэглэгчдийг, Оюу Толгой ХХК-аас Ханбогд, Баян-Овоо сумын хэрэглэгчдийг цахилгаан эрчим хүчээр хангах техник зохион байгуулалтын арга хэмжээ авч байгаа аж.