Монголын Үндэсний Их Сургууль, Чусонь Их Сургуулийн хамтран хэрэгжүүлж буй “Тэргүүлэх Их Сургууль Бэлтгэх Олон Улсын Хамтын Ажиллагааны Төсөл”-өөс ЭХЭМҮТ-ийн хүүхдийн хорт хавдрын тасагтай хамтран “Хорт хавдартай хүүхдийн ар гэрийнхэнд зориулсан семинар”-ийг өнгөрсөн 10 сарын 8-ны Лхагва гарагт зохион байгууллаа.
Энэ удаагийн семинарт хүүхдийн хорт хавдрын тасгийн хяналтанд байдаг болон хорт хавдрын тасагт хэвтэн эмчлүүлж буй хүүхдүүдийн ар гэрийнхэн оролцсон бөгөөд сургалт “Simulation education” хэлбэрээр явагдсан учир бодит амьдрал дээр хэрэгжүүлэх боломжийг олгон дадлага хийх цагийг мөн тусад нь гаргаж өгсөн.
Семинарын лектороор МҮИС-ийн сувилахуйн тэнхимийн багш нар, ЭХЭМҮТ-ийн сувилахуйн албаны ажилчид, МСН-ийн тэгүүн зэрэг хүмүүс оролцож лекц уншив. Хорт хавдартай хүүхдүүдийн гэр бүлийнхэн “Богино хугацаанд олон зүйлийг сурч чадсан, бие биенийхээ зовлонг хуваалцсан цаг байлаа” хэмээн нулимс дуслуулан хэллээ. Мөн ийм сургалтуудыг ойр ойрхон зохион байгуулвал сайн байна гэв. Хорт хавдрын улмаас зовж шаналж буй хүүхдүүдэд зориулж “Зовлон шаналал болон айдсаа даван дийлэх нь” гэх мэт сэдвээр сургалт явуулж өгөхийг зохион байгуулагчдаас хүссэн юм.
ЭХЭМҮТ-ийн судалгаанаас үзвэл Монгол Улсад хорт хавдартай хүүхдүүдийн тоо сүүлийн гурван жилийн байдлаар 2880 байгаа бөгөөд зонхилох хорт хавдар нь цусны хорт хавдар, төв мэдрэлийн системийн хорт хавдар, ясны хорт хавдар гэсэн дараалалтай байна.
Энэ семинарийг зохион байгуулсан “Тэргүүлэх Их Сургууль Бэлтгэх Олон Улсын Хамтын Ажиллагааны Төсөл”-ийн дарга Ким Жинь Хый профессор нь Ковид 19-ийн улмаас Монголд ирж чадаагүй боловч “Төслийн Монгол дахь менежер Пак Даль Рим болон төслийн багийхан, МҮИС-ийн Сувилахуйн тэнхимийн багш нартай хамтран төсөл үр дүнтэй хэрэгжиж байгаад баяртай байна. Төслийн үлдсэн хугацаанд Сувилахуйн мэргэжлийн сурах бичиг гаргах, багш болон оюутны чадварыг сайжруулахын тулд үргэжлүүлэн хамтран ажиллах болно” хэмээлээ.
