Замын-Үүдээс Эрээн рүү гарсан ачаатай 150 орчим автомашиныг өнөөдөр Хятадын талаас хилийн цэг дээр хүргэж эхэлжээ. Ингэхдээ өдөрт 20-30 автомашин байршуулах аж.
Манай талаас автомашиныг өдөр өдөрт нь татаж авах хүсэлт гаргасан ч Хятадын тал халдварын дэглэм зөрчинө гэж үзсэн байна. Тиймээс урд байгаа бүх автомашиныг хилийн цэг дээр ирсний дараа татан авалт хийхээр болсон талаар Хилийн 108 дугаар ангийн Штабын дарга, дэд хурандаа Н.Баяржаргал мэдээллээ.
Тэрээр “Өнөөдөр 25-30 машин оруулна гэж Эрээний боомтоос мэдээлсэн. Одоогоор 20 орчим автомашин хилийн шугам дээр ирсэн байна. Манай талаас автомашинуудыг шалгаж, нэвтрүүлээгүй байна. Хилийн хяналтын байгууллагууд бэлэн байдлаа хангаад нөгөө талын шийдвэрийг хүлээж байна. Уг нь хил дээр ирсэн автомашиныг өдөр өдөрт нь татаж авах хүсэлт гаргасан ч Хятадын тал халдвар дамжих эрсдэлтэй гэж үзсэн.Тиймээс 2-3 хоногийн дараа бөөнд нь татаж авах тухай яригдаж байгаа. Өөрөөр хэлбэл, нөгөө талаас автомашинуудыг хил дээр хүргэсний дараа бид татан авалтаа хийнэ. Үүнд 2-3 өдөр зарцуулна байх” гэлээ.