АНУ-ын төрийн сан Ерөнхийлөгч асан Барак Обамагийн үед хийхээр төлөвлөж байсны дагуу эрх чөлөөний тэмцэгч Харриет Тубманы хөргийг 20 долларын дэвсгэрт дээр буулгах ажлыг зохион байгуулах талаар Цагаан ордны хэвлэлийн нарийн бичгийн дарга Жен Псаки даваа гаригт мэдээлэв.
Тэрээр “Хамгийн чухал нь АНУ-ын мөнгөн тэмдэгтүүд манай улсын түүх, соёлыг илэрхийлж байх учиртай. Харриет Тубманы зурагтай 20 долларын дэвсгэрт үүнийг илэрхийлэх нь дамжиггүй. Тиймээс бид энэ ажлыг үргэлжлүүлэх арга хэмжээг авч байна” гэлээ.
Ингэснээр Америкийн цаасан мөнгөн дээрх анхны өнгөт арьст эмэгтэй болж байгаа юм.
Харриет Тубман нь боолчлогдсон олон зуун хүмүүсийг газар доорх төмөр замыг ашиглан, эрх чөлөөнд хүргэх үйлст томоохон хувь нэмэр оруулсан хар арьст эмэгтэй юм. Тэрээр 1808-1832 оны хооронд Мэрилэнд мужийн Дорчестер тойрогт боолчлогдсон эцэг эхийн гэрт есөн хүүхдийн нэг болон мэндэлжээ. Тубман амьдралаа эрсдэлд оруулж, олон зуун гэр бүл болон бусад тариалангийн боолуудыг эрх чөлөөнд хүргэсэн нэгэн юм. Мөн Америкийн иргэний дайны үеэр тэрээр Эвслийн армид тусалж, бусад үүрэг гүйцэтгэхэд тагнуулчаар ажиллаж байжээ. Иргэний дайны дараа тэрээр хуучин боол байсан ядуус, хөгшдөд туслах ажилд үлдсэн амьдралаа зориулжээ. Тубман 1913 оны гуравдугаар сарын 10-нд 93 насандаа уушгины хатгалгааны өвчнөөр таалал төгсчээ.