“Brent” маркийн нефтийн аравдугаар сард нийлүүлэх гэрээний үнэ Бямба гаригт нэг торх нь 72.70 ам.долларт хүрсэн бол “WTI” маркийнх 68.74 ам.доллар болсныг “Bloomberg” мэдээлэв. Энэ долоо хоногт “Brent” маркийн нефтийн үнэ 8.9 хувиар, “WTI”-гийнх 9.55 хувиар өсч, нефтийн үнэ өнгөрсөн оны аравдугаар сараас хойших хамгийн өндөр үзүүлэлтэд хүрчээ.
Өнгөрсөн Баасан гаригийн өглөөний байдлаар ам.долларын ханш сул байсны улмаас нефтийн үнэ өссөн байна. Энэ долоо хоногийн арилжааны явцад “хар алт”-ны үнэ 9-9.5 хувиар өсч, өнгөрсөн оны аравдугаар сараас хойших хамгийн дээд үзүүлэлтэд хүрчээ.
Арилжааны мэдээллээс үзвэл, “Brent” маркийн нефтийн арваннэгдүгээр сарын фьючерс хэлцлийн үнэ 1.28 хувиар өсч, нэг торх нь 71.08 ам.доллар, аравдугаар сарынх 1.41 хувиар өсч, 72.07 ам.доллар болжээ.
АНУ-ын худалдааны гол түншүүд болох зургаан улсын валютын сагстай харьцах долларын ханшийг харуулдаг индекс 0.07 хувиар буурч, 93 пункт болсон байна.
Үүнээс гадна хөрөнгө оруулагчид наймдугаар сарын 27-нд дууссан долоо хоногт АНУ-д газрын тосны хэчнээн цооног ажилласан талаарх нефтийн талбайн үйлчилгээ эрхэлдэг “Baker Hughes” компаниас гаргадаг мэдээллийг хүлээж буй аж. Өмнөх долоо хоногт энэ тоо найман нэгжээр өсч, 405 агрегат болжээ.