Монгол Улсын Ерөнхийлөгчийн сонгуулийн бэлтгэл ажилтай холбоотой зарим асуудлаар Сонгуулийн ерөнхий хорооноос мэдээлэл хийлээ.
Сонгуулийн бэлтгэл ажлын хүрээнд өнөөдөр санал авах бүх байруудад Сонгуулийн автоматжуулсан системийн тухай хууль, журамд заасны дагуу туршилтын ажлыг зохион байгуулжээ. Туршилтаар санал тоолох төхөөрөмж санал авах байрандаа нэгбүрчлэн хүргэгдсэн эсэх, тээвэрлэлтийн явцад эвдрэл гэмтэл гарсан эсэх, саналын хуудсаа зөв уншиж, бодож байгаа эсэх, мөн үр дүнг дамжуулах зэргээр тэдгээрийн хэвийн ажиллагааг шалгаж бэлэн байдлыг тогтоосон байна.
СЕХ-ны Мэдээлэл, судалгаа, арга зүйн хэлтсийн дарга Б.Оюумаа “Улсын хэмжээнд 1983 хэсэг, санал авах байр байгуулагдаж, сонгуулийн бэлтгэл ажлаа хангаад сонгогчийн санал авахад бэлэн боллоо. Дөрөвдүгээр сарын 19-ний байдлаар Улсын бүртгэлийн газраас ирүүлсэн тоогоор 2.2 сая сонгогч бүртгүүлжээ. Үүнээс хойш сонгогчийн шилжилт хөдөлгөөн зогссон. Зөөврийн битүүмжилсэн хайрцгаар санал авах сонгогчийн хүсэлт хүлээж авах хугацаа өчигдөр дуусгавар болсон. Сонгуулийн саналын хуудас бүрэн хэвлэгдэж, хөдөө орон нутагт хүргэгдсэн. Сонгуулийн сурталчилгаа энэ сарын 24-ний өдрөөр дуусгавар болно” гэв.
Мөн СЕХ-ны Хууль эрхзүйн хэлтсийн ахлах референт Д.Бат-Эрдэнэ Ерөнхийлөгчийн сонгуульд МАХН-аас нэр дэвшигч С.Ганбаатартай холбоотой асуудлаар мэдээлэл хийв. Тэрбээр “СЕХ-нд “Орон нутгийн сонгогчдын эрх ашгийг хамгаалах нийгэмлэг” ТББ, “МАХН-ын гишүүд дэмжигчдийн холбоо”-ноос нэр дэвшигч С.Ганбаатар гадаадын иргэнээс хандив авсан эсэх мэдээллийг шалгуулахаар хүсэлт ирүүлсэн. Үүнээс гадна БНСУ-ын иргэн Ю Ван Сүгээс СЕХ-нд хандан “Би МАХН-аас нэр дэвшигч С.Ганбаатарт хандив болгож 50 сая вон өгснөө хүлээн зөвшөөрч, уучлал хүсч байна. Энэ асуудлыг шалгаж өгөхийг хүсч байна” гэсэн өргөдөл ирүүлсэн. СЕХ-нд аливаа гомдол, өргөдлийг шалгаж тогтоох эрх мэдэл байхгүй учир эдгээр гомдол, өргөдлийг цагдаагийн байгууллагад шилжүүлсэн” гэлээ.