Японы сумо бөхийн намрын барилдаан энэ гаригт өндөрлөсөн. Монгол Улсын Хөдөлмөрийн баатар, Гавьяат тамирчин, Мэргэжлийн сумогийн 69 дэх их аварга Хакухо М.Даваажаргал Японы эзэн хааны цомыг 41 дэх удаагаа хүртэж, дээд зиндаанд 1,000 дахь ялалтаа байгуулж хоёр дээд амжилтыг нэгэн зэрэг тогтоосон. Тэрбээр түүхэн амжилтуудаа монголчуудтайгаа хуваалцахаар эх орондоо ирээд байна. Хакухо М.Даваажаргал яг одоо төрийн ордонд ээжтэйгээ хамт зочилж УИХ-ын дарга М.Энхболдтой уулзаж байна.
Гэмтлийн улмаас таван тэмцээн дараалан түрүүлж чадаагүй байсан Хакухо энэ оны анхны түрүүгээ ийнхүү авч байна. “Нас явахын хэрээр миний гэмтэж бэртэх нь амархан болоод байгаа. Тийм учраас би энэ түрүүг авахдаа ингэж их удлаа. Энэ түрүү миний хувьд их үнэ цэнэтэй юм” гэж тэмцээний дараа телевизэд ярилцлага өгөх үеэрээ ярьжээ.