Бүгд найрамдах Кени улсын нийслэл Найроби хотын зах хэсэгт орших Матхаре гэх ядуусын хорооллын иргэд ATM шиг хэлбэр, зориулалттай түгээгүүрээс ундны цэвэр усаа маш хямдаар авах боломж бүрджээ. Ядуусын хорооллын оршин суугчид өмнө нь цэвэр усыг өндөр үнээр худалдан авах, эсвэл бохир усыг ундандаа хэрэглэх гэсэн сонголттой тулгардаг байсан аж. Харин “Усны ATM” хэрэглээнд нэвтэрснээр хүмүүс смарт карт ашиглан амар хялбар аргаар хамгийн гол нь цэвэр усыг хямд үнээр худалдан авах боломжтой болсон байна.
Одоогоор энэхүү ус түгээгчийг Найроби хотын дөрвөн байршилд байрлуулаад байгаа юм байна. Харин цаашдаа бүр илүү олон түгээгүүрийг захын ядуусын дүүргүүдэд байрлуулахыг хүмүүс найдлага тавин хүлээж буй аж. Үнийн хувьд “Найроби хотын цэвэр, бохир ус” компанийн мэдэгдсэнээр, 20 литр усыг 50 центээр борлуулж байгаа юм байна.
Тус компани бусад ус түгээгч компаниас хамаагүй хямд үнээр усаа борлуулж байна гэж Найроби дахь “BBC” телевизийн сурвалжлагч Абдуллахи Абди мэдээлжээ. Ундны усанд цэвэр ус хэрэглэдэг болгох нь НҮБ-ын Мянганы хөгжлийн зорилтуудын нэг юм. Гэхдээ өнөөдөр дэлхийн хэмжээнд 700 сая гаруй хүн цэвэр ус ундандаа хэрэглэж чадахгүй байгаа аж.