АНУ-ын Калифорни мужийн ассамблей Даваа гарагт сошиал сүлжээний донтолтоос хүүхдүүдийг хамгаалах хуулийн төслийг хэлэлцэж, дэмжжээ.
Хэрвээ уг хууль амьдралд хэрэгжвэл хүүхдийг нь сошиал сүлжээнд донтуулсан компаниас эцэг эхчүүд $25,000 хүртэл мөнгө нэхэмжлэх эрхтэй болох юм байна.
Одоо Калифорни мужийн сенат уг хуулийн төслийг хоёр долоо хоногийн хугацаанд хэлэлцэж, санал хураасны дараа дэмжигдвэл хэрэгжих шатандаа орох юм.
Хуульд хамаарагдах компаниуд нь жилийн $100 саяас дээш орлоготой байх ёстой гэнэ. Гэхдээ имэйл, мессенжэрийн платформуудад үйлчлэхгүй юм байна.
Өөрөөр хэлбэл Фэйсбүүк, Инстаграм зэрэг сошиал платформууд хамрагдах юм.
Хэрвээ хууль хэрэгжиж эхэлбэл сошиал медиа компаниуд эрсдэлээс сэргийлэхийн тулд Калифорни мужийн 18 хүртэл насныханд үйлчлэхээ зогсоож магадгүйг бизнесийн эрх ашгийг хамгаалах байгууллагууд анхааруулсан байна.