Хөвсгөл аймгийн “Дэлгэр мөрөн” голд сэлж байсан 21 настай эрэгтэй живж, харамсалтайгаар амиа алджээ.
Тодруулбал, Хөвсгөл аймгийн Мөрөн сумын Урандөш багийн “Өндөр-Эрэг” хэмээх газар /аймгийн төвөөс баруун зүгт 5 км-т/ “Дэлгэр мөрөн” голд хоёр хүн сэлж байснаас тус сумын Үерт багийн харьяат иргэн М /21 настай, эрэгтэй/ живсэн тухай дуудлагыг энэ сарын 18-ны өдрийн 20:00 цагт онцгой байдлын газар хүлээн авчээ.
Тус аймгийн Онцгой байдлын газрын Эрэн хайх аврах салбарын 15 алба хаагч, ар гэрийн 12 хүн, нийт 27 хүн, таван автомашин, хоёр завьтайгаар тус сумын “Өндөр-Эрэг” гэдэг газраас “Хилэнтийн гүүр”, “Өндөр хясаа”, “Хүүшийн булан”, “Ногоон булаг,, “Баян-Эрхэт” гэдэг газар болон Тосонцэнгэл сумын Сэлэнгэ багийн “Цацын булан”, “Ялаатын-Ам”, “Тээлийн-Ам” гэдэг газар хүртэл нийт 160 км-т завиар эрэн хайх ажиллагааг зохион байгуулсан байна.
Ийнхүү долдугаар сарын 25-ны өдрийн 16:47 цагт Тосонцэнгэл сумын Тээл багийн “Тээлийн-Ам” гэдэг газрын (осолдсон газраас зүүн урд зүгт 160 км-т) “Сэлэнгэ” мөрний салаанаас иргэн М (21 настай, эрэгтэй)-гийн цогцсыг олж, Цагдаагийн байгууллагад шилжүүлэн өгчээ.