Дархан-Уул аймгийн нэгдсэн эмнэлгийн хавдрын тасгийн сувилагч Ж.Уранчимэг цусны цочмог явцтай үүдэл эсийн хорт хавдартай болохоо эмнэлгийн ажилчдын ажил хаялт, суултын үеэр олон нийтэд зарлаж байсан билээ. Тэрээр өнгөрсөн сард “Цензургүй яриа” нэвтрүүлэгт уригдан оролцсон. Тэгвэл Ж.Уранчимэгийг тус нэвтрүүлэгт орсны дараахан нэгэн залуу гэр бүл түүнтэй холбогдож байр бэлэглэхээр болсноо дуулгасан аж.
Сайхан сэтгэлт залуу хос сувилагч бүсгүйд хэлсэндээ хүрч байрныхаа түлхүүрийг өчигдөр гардууллаа. Энэхүү үйл явдлыг “Цензургүй сурвалжлага” багийнхан шууд дамжуулсан юм. Ж.Уранчимэг гурван охинтой өрх толгойлсон эмэгтэй юм. Өвчиндөө шаналж явсан түүнд туслахыг хүссэн хүмүүсийн цуглуулсан хандиваар эмчилгээний зардал нь бүрдэж ирэх долоо хоногт Энэтхэг улсыг зорихоор болжээ.