Ерөнхийлөгчийн хоригийг хүлээж авах асуудлаар Төрийн танхимд гишүүд хэрэлдэж байна.
Ц.Гарамжав: Нэг хүн рүүгээ ямар их дайрдаг юм бэ. Намайг өнгөрсөн жил байнга гүтгэсэн. Бид үлгэрлэж суугаа учраас залуус ч цахим орчинд юу хүссэнээ бичиж байна. Анхаарах ёстой шүү. Бид зөв бодлого, хууль гаргаж, эх орноо зөв удирдах ёстой.
Г.Занданшатар: Би төрийн сүлдэндээ тангараг өргөсөн хүний хувьд Үндсэн хуулийг агуулгаараа зөрчсөн хоригийг хүлээж авахгүй гэдэг хатуу байр суурьтай байна. Бид Үндсэн хуулийн зөрчилтэй хоригийг хэлэлцэж байна. Хүний томилгоонд хориг тавьсан тохиолдол дэлхийн болон Монгол Улсын түүхэнд байхгүй. Үндсэн хуулийн цэцийн ганц гишүүнд хориг тавьж байснаас өөр ийм асуудал гарч байгаагүй.
Ж.Мөнхбат: Танхимын сайдаа өмөөрч мууг нь сайн, муухайг нь гоё гэдэг юм. Ойлгож байна. Гэхдээ Ерөнхий сайд ямар зарчим баримтлаад байгааг ойлгохгүй юм. Гэр бүлээрээ лиценз зараад идчихсэн хүнийг зүтгүүлээд байх юм. Хоёр, гурван баримт байна аа. Эрдэнэтийн 49 хувийг ард түмний мэдэлд авч ирнэ гэхэд намынхаа эсрэг кноп дарж байсан хүнийг Сангийн сайдад зүтгүүлж байна даа. Багш, төрийн албан хаагчид өөрсдөө зөвшөөрөхгүй байгаа тэтгэлгийг өгнө гэж зүтгээд л.
55 тэрбум буюу 55 цэцэрлэг барих мөнгийг халамж хэлбэрээр тараах нь ээ. Өмөөрөхөд үнэхээр хэцүү юм аа. Дубайн гэрээг бид сайжруулна гэж явахад эсрэг байр суурь илэрхийлж явсан хүн шүү дээ. Энэ хүн бол монголын эрх ашгийн эсрэг дандаа зогсч байсан хүн шүү. Би хувийн ямар ч атаа хорсол байхгүй ээ. Зарчмын хувьд дэмжихгүй ээ. Нүүрэн дээр нь хэлчихээд цаашаа явдаг хүн. Тэр зарчмаараа л хэлж байна. У.Хүрэлсүхийн Засгийн газрын хамгийн эмзэг цэг нь. Та юу гээд хүн загнаад байгаа юм бэ. Чи хулгай хийгээгүй юу. Битгий солиор.
М.Энхболд: Ерөнхий сайд, Ж.Мөнхбат хоёр больчих. Их хурлын чуулганы танхимд битгий хэрэлдээд бай. Хоёулаа дуугүй бол.
Лу.Болд: Ш.Раднаасэдэд үг хэлье. Залуу даргад анхааруулга хэлье. Ард түмнээ доромжлоод явж байна. Монгол Улсад гэмт хэрэггүй хүн байхгүй гэж ярьж байна. Монголын иргэдийг ингэж доромжилж болохгүй ээ.
УИХ-ын чуулганы нэгдсэн хуралдаан үргэлжилж байна. Хуралдааны үеэр Ерөнхий сайд У.Хүрэлсүх УИХ-ын гишүүн Ж.Мөнхбат нар маргалдах үед тэрбээр “Ж.Мөнхбатын авлигаар томилсон бүх дарга нарт үгүй гэж хэлнэ. Төрийн хулгайч, тонуулчдад гишгэх газар байхгүй шүү” хэмээн орилсон юм. УИХ-ын дарга тэдний маргааныг тасласны дараа гишүүд үргэлжлүүлэн саналаа хэлж эхлэв.
Л.Болд: Ардчилсан хувьсгал нэг ч цонх хагалалгүйгээр болж байсан. МАН өнөөдөр 76-аас 65 суудал авсан. Сөрөг хүчнийхээ намаас өнөөдөр Ерөнхийлөгчөө сонгосон нь Үндсэн хуулийн гайхамшиг юм шүү. Ард түмэн өнөөдөр төрд тэнцвэртэй хяналт байлгахыг зорьсон нь энэ. Гэтэл монголын ард түмнийг ингэж доромжилж болохгүй.
Л.Элдэв-Очир: Нам дотор хагаралдан бутаргах үйл ажиллагааг зохион байгуулалттайгаар хйиж байна. Цаашид нэг нэгээр нь биднийг батлагдаж, нотлогдоогүй үндэслэлээр намнах юм байна гэж харагдаж байна. Хүний шидсэн хортой алимыг идчихээд ингэж хагаралдаж болохгүй.
Д.Хаянхярваа: Өнөөдөр бид өшөө хорсол руу явж байна. Ерөнхийлөгч Тамгын газрын даргадаа хариуцлага тооц л доо. Өнөөдөр энэ хүнээс болж Ерөнхийлөгчийн нэр хүндэд ч сөргөөр нөлөөлнө. Энэ мэт асуудлуудаа бид шийдвэрлэж нэг тийш нь болгохгүй бол намын нэр хүндэд ч сөргөөр нөлөөлнө шүү.