Өнгөрсөн лхагва гаригийн орой Япон улсын Элчин сайдын өргөөнд Шинэ Монгол Эрдмийн Хүрээлэнгийн ерөнхийлөгч Жанчивын Галбадрахад “Мандах нар” одон гардуулах ёслолын арга хэмжээ болов.
Ж.Галбадрахын Монгол Улсад Япон хэв маягийн боловсролыг түгээх дэлгэрүүлэх болон хоёр орны харилцан ойлголцлыг нэмэгдүүлэхэд үнэлж баршгүй хувь нэмэр оруулсан гавьяаг үнэлэн Япон улсын Цог жавхлант Эзэн хаанаас эрхэм дээд шагнал болох “Мандах нар” одонг олгохоор шийдвэрлэжээ.
Шагналыг Япон улсаас Монгол Улсад суугаа Онц бөгөөд Бүрэн эрхт Элчин сайд Масаока Такаока гардуулж өгөв.
Ж.Галбадрах нь 1995 онд Япон улсын засгийн газрын тэтгэлэгт хөтөлбөрөөр Ямагата их сургуульд Японы Боловсролын тогтолцооны талаар суралцаж байх үедээ анх Японы сургалтын хөтөлбөрийг Монголд нэвтрүүлэн, Япон хэв маягийн сургуулийг Монголд нээж байгуулахыг зорьжээ.
Түүний ажилч хичээнгүй зан чанар, өөртөө тавьсан өндөр зорилгыг нь үнэлэн Япон дэмжигчид нь “Багана нэгийн холбоо”-г үүсгэн байгуулсан бөгөөд Ж.Галбадрах нь тус холбооны дэмжлэгтэйгээр 2000 онд Монголд анхны Япон хэв маягийн ахлах сургууль болох “Шинэ Монгол” сургуулийг байгуулсан байн.
Ж.Галбадрах нь 2000 оноос хойш одоог хүртэл Япон хэл, Япон хэв маягийн сургуулийн удирдлагаар тасралтгүй ажиллаж буй бөгөөд “Бага дунд ахлах сургууль, Косэн, Технологийн их сургууль”-ийг нэмж байгуулан “Шинэ Монгол эрдмийн хүрээлэн” болгон сургуулиа өргөжүүлсэн байна. Тус сургууль нь ирээдүйд Япон Монгол хоёр орны хооронд гүүр болон ажиллах шилдэг сурагчдыг бэлдэн сургаж байгаа билээ.
Тэрбээр Японы “Ротари Ёнэяма” тэтгэлэгт хөтөлбөр болон “Мабүчи” олон улсын тэтгэлгийн сан зэрэг Японы боловсролын байгууллагуудтай идэвхтэй холбоо тогтоон ажилладаг байна.
