Ерөнхий сайдын үүрэг гүйцэтгэгч Ж.Эрдэнэбат өнөөдөр БНПУ-ын “Полмот холдинг”-ийн Хөгжлийн газрын захирал Марек Полыг хүлээн авч уулзлаа. Манай хоёр улсын Засгийн газрын хэлэлцээрийн хүрээнд Польш улсаас 50 сая еврогийн хөнгөлөлттэй зээл авч 32 саяыг нь хөдөө аж ахуйн салбарт зарцуулахаар болоод байсан. Энэ зээлийн хүрээнд “Полмот холдинг” манай улсад трактор угсрах үйлдвэр байгуулах саналаа тавьж Засгийн газрын зүгээс дэмжлэг хүссэн байна. Тус компани хэд хэдэн тракторын үйлдвэр байгуулсан туршлагатай бөгөөд ирэх намар гэхэд “Монголд үйлдвэрлэв” гэсэн тодотголтой трактор худалдаанд гаргахаар төлөвлөжээ. Үүний хариуд Ерөнхий сайдын үүрэг гүйцэтгэгч Ж.Эрдэнэбат “Монгол Улсын Засгийн газар хөдөө аж ахуйн бүтээгдэхүүнээрээ дотоодынхоо хэрэгцээг хангаж улмаар экспортын чиглэлийн бүтээгдэхүүн үйлдвэрлэхийг зорьж байна. Хөдөө аж ахуйн техник, тоног төхөөрөмжийг эх орондоо үйлдвэрлэхийг зорьж байгаа. Үүнд танай санал чухал түлхэц болж байна” гэв.
С.АЛТ