ГХЯ-ны ээлжит “Мэдээллийн цаг”-т Гадаад харилцааны сайд Ц.Мөнх-Оргил оролцсон юм. Ирэх зургадугаар сард Ерөнхийлөгч Ц.Элбэгдорж Казахстан улсад, Ерөнхий сайд Ж.Эрдэнэбат ОХУ-д албан ёсны айлчлал хийнэ хэмээн тэр мэдээлсэн юм.
Тодруулбал Ерөнхийлөгч Ц.Элбэгдорж ирэх сарын 8-9-нд Казахстаны нийслэл Астана хотноо болох Шанхайн хамтын ажиллагааны байгууллагын төрийн тэргүүнүүдийн зөвлөлдөх уулзалтад оролцоно.
Харин Ерөнхий сайд Ж.Эрдэнэбатын хувьд ОХУ-ын Засгийн газрын тэргүүний урилгаар Санкт-Петербургийн олон улсын эдийн засгийн чуулга уулзалтад оролцох юм байна. Петербургийн олон улсын эдийн засгийн форум ирэх сарын 1-3-ны хооронд болох ажээ.