Залуучуудын чөлөөт цагаа зөв, боловсон өнгөрүүлэх орчныг сайжруулах, бодибилдингийн спортоор хичээллэх залуучуудыг дэмжих, нийтийн биеийн тамир, спортыг хөгжүүлэх зорилго бүхий “Ирээдүйн мистер-2018” тэмцээн маргааш буюу энэ сарын 31-нд Соёлын төв өргөөнд болно.
Уг тэмцээнийг Нийслэлийн Залуучуудын хөгжлийн газар (НЗХГ), Монголын Бодибилдинг Фитнессийн Холбоо хамтран 22 дахь удаагаа зохион байгуулж буй юм. НЗХГ-ын дарга С.Сүх-Очир “Тус тэмцээнд одоогоор Улаанбаатар хотын есөн дүүрэг, Дорнод, Дундговь, Төв, Сэлэнгэ, Дархан, Баянхонгор аймгийн 31 клубын нийт 108 тамирчин оролцохоор бүртгүүлээд байна. “Ирээдүйн мистер” тэмцээнд олон улс, тив, дэлхийн болон улсын аварга шалгаруулах тэмцээнээс шагнал авч байгаагүй залуу тамирчдыг оролцуулдаг онцлогтой. Тэмцээн 10 ангилалтай. Жин тус бүрийн эхний таван байрт шалгарсан тамирчид финалын шалгаруулалтад оролцох эрхээ авах бөгөөд жингийн аваргын төлөө өрсөлдөх болно” гэв.
Тэмцээн маргааш 15.00 цагт эхэлнэ.