Монголын Үндэсний бөхийн холбооны VIII дахь “Их Эе” хуралдаан өнөөдөр “Чингис хаан” зочид буудалд 10:00 цагаас эхэллээ. Энэ удаагийн хуралд дэг жаягийнхаа дагуу нийт 200 төлөөлөгч оролцдог юм. Гэвч бидэнд ирсэн мэдээллээр Х.Баянмөнх, Г.Өсөхбаяр аваргуудад хурлын мандат олгохгүй байна гэсэн мэдээлэл ирсэн. Уг нь МҮБХ-ны журмаар “Их Эе” хуралдаанд аварга, арслан, гарьд, заанууд цолтонгууд ямар нэгэн сонгуульгүйгээр бүгд орох ёстой байдаг юм.
VIII дахь “Их Эе”-ийн өмнө олон маргаантай асуудал гарсан. Хуралдаан болохын өмнө буюу өнгөрөгч лхагва гаригт Шүүхийн шийдвэр гүйцэтгэх байгууллагын алба хаагчид Бөхийн өргөөнд очиж, “Их Эе”-ийг хуралдуулахгүй гэсэн шүүхийн шийдвэрийг Холбооны тэргүүн Р.Нямдоржид гардуулж өгөхийг хүссэн. Үүнээс болж, Бөхийн өргөөнд үймээн гарсан. Учир нь “Их Эе”-ийг зохион байгуулахтай холбогдуулан тус холбооныхон дотоод ажилтай хэмээн хаалгаа түгжсэн нь шүүхийн шийдвэрийн алба хаагчдын хаалга эвдлэн ороход хүргэсэн талаарх мэдээллийг бид өмнө хүргэж байсан.
Үндэсний бөхийн холбооны “Их Эе” хурал 2002 онд болох үеэр дархан аварга, УИХ-ын гишүүн А.Сүхбат тэргүүтэй бөхчүүд тухайн үед эсэргүүцэн хурлыг орхиж байв. Үүнээс хойш 2006 онд болох байсан хурал шүүхийн маргааны улмаас тасалдаж, 2010 онд VI хурал болсон түүхтэй. Харин 2014 онд маргааны улмаас “Их Эе” VII хурал зохион байгуулагдаагүй юм.