Монголын Үндэсний Бөхийн Холбооны ээлжит бус “Их Эе”-ийг хуралдуулж, шинэ тэргүүнээ сонгосон талаарх хэвлэлийн хурал Хэвлэлийн хүрээлэнд 12.00 цагаас болно.
Тэгвэл Монголын Үндэсний Бөхийн Холбооны ээлжит бус “Их Эе” хурал болсонтой холбогдуулан одоогийн Үндэсний бөхийн холбооноос мөн мэдээлэл хийхээр болжээ. МҮБХ-ны өнөөгийн тэргүүнээр Р.Нямдорж, дэд тэргүүнээр Д.Данзан нар ажиллаж байгаа бөгөөд тус холбооноос 15.00 цагаас Бөхийн өргөөнд мэдээллийг өгөх аж.
Монголын Үндэсний Бөхийн Холбооны ээлжит бус ”Их Эе” хурал өнгөрөгч арванхоёрдугаар сард хуралдана гэж байсан юм. Тухайн үед дархан аварга, УИХ-ын гишүүн А.Сүхбат тэргүүтэй бөхчүүд “Их Эе” хуралдахаар болсныг хэлж, одоогийн тэргүүн Д.Нямдоржийг ажлаа өгөхийг шаардаж байсан. Мөн Д.Нямдорж арванхоёрдугаар сард хэвлэлийн хурал зарлаж, дараах мэдэгдлийг хийж байсан юм. “Д.Данзан бид хоёр холбоогоо олон жил удирдлаа. Одоо залуу үедээ халаагаа өгөх цаг нь болсон. 2017 онд багтаан ажлаа хүлээлгэж өгнө. Ойрын хугацаанд Цэцдийн зөвлөлийг хуралдуулж, “Их эе”-ийн товыг тогтооно.” гэж байсан билээ.
Тэгвэл “Их Эе”-ийг хуралдуулах болсон Ажлын хэсэг өчигдөр буюу тавдугаар сарын 28-д хурлаа хийжээ. Энэхүү хурлаар Монголын Үндэсний Бөхийн холбооны тэргүүнээр Л.Чинбатыг сонгосон юм. Мөн Ажлын хэсгээс хурал болохын өмнө ‘Үнэнийн мөрөөр’ гэсэн баримтат нэвтрүүлэгийг бэлтгэж, одоогийн тэргүүн Р.Нямдоржийн талаарх ноцтой гэх мэдээллийг гаргасан юм.
Сонирхуулахад, Р.Нямдорж 1991 оноос хойш МҮБХ-ны тэргүүнээр сонгогдон ажиллаж байгаа юм.