Япон улсад 15 настайдаа анх хөл тавьсан Хакүхо М.Даваажаргал 2000 жилийн түүхтэй мэргэжлийн сүмогийн бүх цаг үеийн дээд амжилтыг эвдлээ.
Хакүхо өнөөдрийн барилдаанд озэки Такаяасуг давснаар 1048 дахь даваагаа авч хамгийн олон түрүүлсэн, хамгийн олон давсан сүмоч боллоо.
Тэрбээр нийтдээ 98 башё барилдаж өнөөдөр ийнхүү 1048 дахь ялалтаа байгууллаа. Өнөөдрөөс эхлэн түүний давсан даваа бүр сүмогийн ноён оргилын хэмжүүр болон босго тогтоож эхэлнэ.
Хакүхо М.Даваажаргал 2007 оны тавдугаар сарын 30-нд 22 насандаа Монголын хоёр дахь, гадаадын дөрөв дэх ёкозүна болсон түүхтэй.
Японы эзэн хааны цомыг 38 дахь удаагаа эзэмшиж буй тэрбээр 12 даваа нэг унаатай Нагоя башёг ганцаараа тэргүүлж байна. Өнгөрсөн башёд нэг ч өвдөг шороодолгүй түрүүлсэн. Харин Нагоя башёгийн 11 дэх өдрийн барилдаанд Хакүхо М.Даваажаргал Митакэүмид ёрикири мэхээр өвдөг шороодсон юм.