Мэргэжлийн сүмогийн дээд зиндаанд анх барилдахдаа 13 ялж, олныг шуугиулсан Монголын бөх Ичиножёо хэмээх А.Ичинноров хомхойн нэг төрөл болох Бүслүүр үлд-Herpes zoster өвчин тусан эмнэлэгт хэвтжээ. Ийнхүү манай бөх энэ сарын 17-ноос эхлэн тойргийн барилдаанд оролцохгүй боллоо. Бүслүүр үлд нь мэдрэлийн гаралтай өвчин бөгөөд сүүлийн үед маш завгүй явсан Ичиножёо стресс хуримтлагдсанаас болж ийм өвчин туслаа гэж Минато ояката ярьж байна. Оякатагийн ярьснаар ирэх 11 дүгээр сарын тэмцээнд ороход нь ямар нэг сөрөг нөлөө байхгүй гэнэ.
Ичиножёо Намрын тэмцээн дууссанаас хойш элдэв ярилцлага, телевизийн нэвтрүүлэгт уригдан, амрах завгүй явсан бөгөөд 10-ны өдрөөс эхлэн тойргийн барилдаанд оролцож эхэлсэн. Тиймээс ядарч цуцахаас өөр аргагүй байжээ.
Харин Сүмогийн холбооноос “Хүмүүс Ичиножёог харах гэж тойргийн барилдаанд ирдэг болсон. Маш харамсалтай байна. Гэхдээ энэ өвчин сайн амрахгүй бол эдгэхгүй тул яах ч арга алга” гэж мэдэгдсэн байна.