Хойд хөршийн Красноярск хотноо олимпийн хошой аварга Иван Ярыгины нэрэмжит олон улсын уламжлалт тэмцээн баасан гарагт эхэлж, энэ өдөр манай тамирчдаас О.Насанбурмаа мөнгө, Э.Гантуяа, Ш.Түмэнцэцэг нар хүрэл медаль хүртлээ.
Тухайлбал, эмэгтэйчүүдийн 69 кг-д гавьяат О.Насанбурмаа нэгдүгээр тойрогт ОХУ-ын бөх Юлия Максимоваг 6:0, хоёрдугаар тойрогт Ш.Түмэнцэцэгийг 8:3 оноогоор тус тус ялсан. Улмаар хагас шигшээд ОХУ-ын бөх Ксения Бураковаг цэвэр ялж, алтан медалийн төлөө барилдаанд АНУ-ын Т.Менсахтай хүч үзэж 4:8 оноогоор дийлджээ. Ийнхүү О.Насанбурмаа нь тус тэмцээний хошой мөнгө, алт, хүрэл медальт бөх болж байна.
Мөн энэ жинд Ш.Түмэнцэцэг нэгдүгээр тойрогт ОХУ-ын бөх А.Братчиковаг цэвэр ялж хоёрдугаар тойрогт О.Насанбурмаад 3:8 онооны харьцаагаар хожигдсон. Дагах барилдаанд Юлия Максимоваг 10:0 оноогоор ялж хүрэл медалийн төлөө ОХУ-ын бөх К.Бураковаг 12:5 оноогоор хожиж хүрэл медаль хүртлээ.
Харин 58 кг-д ОУХМ Э.Гантуяа нэгдүгээр тойрогт С.Цэрэнчимэдийг 9:7, хоёрдугаар тойрогт ОХУ-ын бөх Х.Муртазалиеваг 10:0 оноогоор ялав. Хагас шигшээд Киргизийн бөх А.Туныбековад цэвэр ялагдаж, хүрэл медалийн төлөө ОХУ-ын бөх М.Матушенког 7:0 хожжээ.
Өнөөдөр тус тэмцээний эрэгтэй 61, 86, 125 кг, эмэгтэй 53, 55, 63, 75 кг-ын жингийн барилдаан болж аваргуудаа тодруулна.