Япон орны хөгжлийн гол хөдөлгөгч хүч болсон Коосэн боловсролын системийн нэгдсэн удирдлагын төв байгууллага болох Үндэсний Технологийн Хүрээлэнгийн төлөөлөл манай улсад үйл ажиллагаагаа явуулж эхэллээ. Тус хүрээлэнгийн нээлтийн үйл ажиллагаа өнөөдөр боллоо.
Японы Үндэсний Технологийн Хүрээлэнгийн ерөнхийлөгч Исао Танигучи:Бид инженер болох хүсэл тэмүүлэлтэй хүүхэд залуусыг 15 наснаас нь эхлэн элсүүлж, таван жилийн хугацаанд чадварлаг боловсон хүчин болгон төгсгөдөг. Манай хөтөлбөрийн гол онцлог нь залууст Япон улсын дэвшилтэт технологийг зааж, дадлага туршлагатай бакалавраас ч илүү мэдлэг чадвар бүхий мэргэжилтнүүдийг бэлтгэдэгт оршиж байгаа юм.
Харин энэ талаар Боловсрол Соёл, Шинжлэх Ухаан, Спортын дэд сайд Ё.Отгонбаяр “Манай улсаас Японд суралцаж байгаа хүүхдүүд ихэвчлэн нийгмийн ухааны чиглэлээр суралцдаг байсан. Монгол Улсын хөгжлийн хэрэгцээ шаардлага нь инженер технологийн боловсон хүчин болоод байна. Коосэний болосвролын тогтолцоогоор Монголд улсад төрийн өмчийн нэг, хувийн өмчийн хоёр сургууль үйл ажиллагаагаа явуулж байна. Төрийн өмчийн сургуульд суралцаж байгаа хүүхдүүд эхнээсээ Япон улсад суралцахаар болоод байгаа. Бидэнд инженер технологийн боловсон хүчин шаардлагатай байгаа учраас Монгол болон Японы Засгийн Газар хамтран “1,000 инженер бэлтгэх” төсөл хэрэгжүүлсэн. Энэхүү төсөл Коосэн сургалтын загвараар явж байгаагаараа онцлогтой. Цаашид бид үйл ажиллагаагаа улам төрөлжүүлж, зам тээвэр, хөдөө аж ахуй, дэд бүтэц зэрэг хэрэгцээ шаардлага бүхий мэргэжилтнүүдийг хамтран бэлтгэх тал дээр ажиллах болно” гэлээ.