-ӨНӨӨДӨР NBA-ГИЙН ТАЛБАЙД НИЙТ ГУРВАН ТОГЛОЛТ БОЛЛОО-
Мемфис Гриззлис багийн талбайд Брүүклин Нэтс зочлон тоглож 98-88-ийн харьцаатай Нэтсчүүд хожлоо. Тэд гуравдугаар үед довтолгоо хамгаалалтаараа 32-18-ийн харьцаатай Гриззлисчүүдийг илүүрхсэн юм. Талбайн зочин багаас довтлогч Дэмари Каррол 24 оноо, 6 самбараас бөмбөг авалт хийж багаа хожилд хөтөлсөн бол сэлгээнээс довтлогч Трэвор Бүүкэр 16 оноо, 11 самбараас бөмбөг авалт гүйцэтгэж туслав. Харин Мемфис Гриззлисээс Марк Газол, Тайрик Эванс нар тус бүр 18 оноо авч багаа тэргүүлэв.
Чикаго Буллзын Юнайтэд цэнтрт Миами Хитчүүд зочлон ирж 100-93-ийн харьцаатай бухнуудыг буулган авлаа. Зочин багаас холбон тоглогч Горан Драгич 24 оноо, 4 холын зайн шидэлт амжилттай болгож багаа хожилд хөтлөв. Харин талбайн эзэн Чикаго Буллзээс жижиг довтлогч Дэнзэл Валинтин 14 оноо, 13 самбараас бөмбөг авалт хийлээ.
Минесато Тимбэрволвэсийн Таргэт цэнтрт Финикс Санс зочлон ирлээ. Тус тоглолтод Тимбэрволвэсчууд 119-108-ийн харьцаатай нарнуудыг хожив. Залуу чононуудаас төвийн тоглогч Карл Энтони Таунс 32 оноо, 12 самбараас бөмбөг авалт хийсэн бол хамгаалагч Жимми Батлэр 25 оноо түүв. Харин Финикс Сансаас Дэвин Бүүкэр тоглолтонд оролцоогүй бөгөөд ТЖ Варрэн 18 оноо авч багаа тэргүүллээ.
Б.АМАРТҮВШИН