Суданы нийслэл Хартум хотод өнгөрсөн долоо хоногийн Бямба гарагийн өглөөнөөс хойш тус улсын хоёр том генерал эрх мэдлийн төлөө хоорондоо тулалдаж эхэлсэн.
Уг хотод Монгол Улсын хоёр иргэн гацжээ. Тэдний нэгэнтэй нь цахимаар холбогдож, нөхцөл байдлыг тодруулав.
Тэрбээр “Түр хугацаагаар энд ирсэн. Байлдааны голомтод гацсан бөгөөд одоо гал зогсохыг л хүлээж байна. Нисэх буудлаа бөмбөгдсөн учраас аль ч улсынхан хүнээ татан авч чадахгүй байгаа. Надаас гадна бас нэг монгол хүн бий бөгөөд бид хоёр тусдаа байгаа. Гадаад Харилцааны Яам болон Батлан Хамгаалах Яамтай тогтмол холбогддог” гэсэн юм.
Энэ асуудалд хэрхэн анхаарч ажиллаж буй талаар Гадаад Харилцааны Яамнаас тодруулахад “Монгол Улсын хоёр иргэн хоргодох байранд орсон. Иргэдээ татан авах асуудлаар Нэгдсэн Үндэстний Байгууллага болон бусад олон улсын байгууллага, Элчин Сайдын Яамдтай өдөр тутам холбогдон ажиллаж байгаа. Олон улсын нислэг хийгдэхгүй байгаа тул бүгд ижил нөхцөл байдалтай байна. Манайхаас анхаарал тавин ажиллаж байгаа” гэсэн юм.