Зургадугаар сарын эхнээс экспорт огцом буурч, 1900 ачаатай тээврийн хэрэгсэл хил гарч чадалгүй сар гаруй гацсан байсан төдийгүй Ханбогд сумын онцгой комиссын шийдвэрээр зургадугаар сарын 23 ны өдрөөс Цагаан хаданд хөл хорио тогтоож, гамшгаас хамгаалах өндөржүүлсэн байдлыг 14 хоногийн хугацаатайгаар зарласан.
Үүссэн нөхцөл байдлын улмаас БНХАУ-ын талаас нүүрсний таталтыг долдугаар сарын-6-ны өдрийг хүртэл түр зогсоох шийдвэр гаргасан юм.
Ийнхүү Гашуунсухайт боомтын нүүрсний экспортонд хүндрэл үүсч, тээврийн компаниудын үйл ажиллагаа зогсонги байдалд орж олон мянган жолооч нар ажилгүй орлого болсон. Энэхүү хүндрэлийг даван туулах, нүүрсний экспортыг гацаанаас гаргаж, хэвийн үргэлжлүүлэхээр тээврийн 160 гаруй компаниуд нэгдэн “Монгол тээвэр нэгдэл” ийн дэргэд ажлын хэсэг байгуулан ажиллаж байгаа аж.
Өмнөговь аймгийн онцгой комисс, холбогдох мэргэжлийн байгууллагууд, Монгол тээврийн нэгдлийн дэргэд ажлын хэсэг хамтран долдугаар сарын 5 ны өдрөөс Гашуунсухайт боомт ажиллаж байна.
Хамтарсан баг гурван өдрийн хугацаанд 294 ачаатай тээврийн хэрэгслийг хилээр гаргаж нүүрсний экспортыг гацнаас гаргажээ. Наадмын амралтын өдрүүдэд Гашуунсухайт боомт хилийн боомт амрах бөгөөд энэ хугацаанд Цагаан хаднаас жолооч нарыг явуулахгүй, гаднаас хүн оруулахгүй аж. Өмнөговь аймгийн онцгой комисс, АТҮТ-өөс эхний гацсан буюу ачаатай байгаа 1900 машинаа хилээр нэвтрүүлж дууссаны дараа буюу долдугаар сарын 20 ноос хойш АОК-оос батлагдсан тусгай журмын дагуу шаардлага хангасан тээврийн компаниудад Цагаан хад руу жолооч нараа татах зөвшөөрөлийг олгох юм байна.