Гадаадад ажиллаж, амьдарч буй монголчууд 2022 оны нэгдүгээр сарын 19-нөөс олон улсаас цахим мөнгөний данс нээж, хөрөнгийн зах зээлд оролцох боломжтой болов. Тодруулбал, Санхүүгийн зохицуулах хороо хамтын ажиллагааны хүрээнд, “HiPay” аппликейшн ашиглаж, гадаадад ажиллаж, амьдарч буй монголчуудад онлайнаар цахим мөнгөний болон үнэт цаасны данс нээх, “Эрдэнэс Тавантолгой” ХК болон бусад ХК-иас ногдол ашгаа авах, цахим мөнгө ашиглаж, хөрөнгийн зах зээлийн арилжаанд оролцох үйлчилгээ нэвтрүүлжээ.
Санхүүгийн зохицуулах хороо энэ удаа технологид суурилсан бүтээгдэхүүн, үйлчилгээний хүрээнд шинээр нэвтрүүлж буй үйлчилгээтэй холбоотой хөрөнгийн зах зээлийн хүртээмжийг нэмэгдүүлэх хууль, журам, дүрмийн хүрээнд бодлогын дэмжлэг үзүүлж ажиллах юм байна.
Монгол Улсын Засгийн газрын 181 дүгээр тогтоолын дагуу “Эрдэнэс Тавантолгой” ХК 2012 онд гурван тэрбум ширхэг хувьцаагаа монгол иргэн бүрд тэгш хувааж хүртээсэн. Covid-19 цар тахалтай тэмцсэн хоёр жилийг хүндхэн туулсан Монгол Улсын хоёр сая 512 мянган иргэн хувьцааныхаа ногдол ашгийг хүртсэн билээ.