Энэ оныг Монгол Улсын Гаалийн байгууллагын удирдах ажилтны зөвлөгөөнөөс тус байгууллагын “Дэвшилтэт технологи- ухаалаг хяналт”-ын жил болгон зарлалаа. Дээрх зөвлөгөөн өнөөдөр, маргааш үргэлжлэх бөгөөд Гаалийн байгууллагын өнгөрсөн оны ололт амжилт, үр дүнг нэгтгэн шинэ ондоо теле-хяналтын иж бүрэн систем нэвтрүүлэх, гаалийн лабораторийн бүрэн шинэчлэл хийх, хилийн боомтын хяналтын дэд бүтцийг сайжруулахад чиглүүлэх ажлаа төлөвлөхөөр зөвлөлдөж байна. Гаалийн байгууллага өнгөрсөн онд Монгол Улсын төсөвт 2.19 их наяд төгрөг төвлөрүүлэх төлөвлөгөөтэйгөөс 2.73 их наяд төгрөг төвлөрүүлж төлөвлөгөөг 124.6 хувиар буюу 538.9 тэрбум төгрөгөөр давуулан биелүүлжээ. Өнгөрсөн онд Гаалийн байгууллага экспортын 530 мянга, импортийн 256 мянган бүрдүүлэлт хийж, нийт экспортын бүрдүүлэлтийн 95 хувийг цаасгүй технологид шилжүүлэв. Худалдааны луйвар, гаалийн зөрчлийг эрсдэлийн судалгаанд суурилан үр дүнтэй илрүүлэн таслан зогсоож чадсанаар нийт 2028 хууль бус үйлдлийг илрүүлэн хянан шийдвэрлэж, 2.3 тэрбум төгрөгийн торгууль ногдуулан, 6.1 тэрбум төгрөгийн гаалийн болон бусад татвар нөхөн төлүүлсэн байна. Хар тамхи, мансууруулах бодис хууль бусаар улсын хил нэвтрүүлэхийг завдсан 15 удаагийн үйлдэлийг илрүүлж, хар тамхи мансууруулах бодисыг илгээх болон хүлээн авдаг хоёр сувгийг илрүүлэн тогтоох үйл ажиллагаанд хууль хяналтын байгууллагатай хамтран ажиллажээ.