Хүчирхийлэл, хар тамхины хэргийн талаар сошиалаар мэдээлсэн Г.Номуундарь охины өмгөөлөгч Р.Булгамаа, О.Чулуунчимэг нар “Өдрийн сонин”-ы Асуух эрхийн танхимд мэдээлэл хийлээ. Тэд мөрдөн шалгах ажиллагаанд дахь хууль зөрчсөн бусад асуудлын талаар ярьсан юм.
Г.Номуундарь охины өмгөөлөгч Р.Булгамаа Гэрчийг байцаахдаа өмгөөлөгчийг байлцуулах хүсэлт тавьсаар байхад биднийг оруулалгүй байцаалт авсан. Мөрдөгч нь гэрчийг байцаана гэсэн цагтаа утсаа унтраагаад, хаалгаа цоожлоод өмгөөлөгч нараас зугтсан хэмээн мэдэгдлээ. Ийм учраас гэрчүүдээс хуулийн дагуу үнэн зөв мэдүүлэг авсан эсэхэд өмгөөлөгчдийн зүгээс эргэлзэж байгаа гэнэ.
Мөн тэрээр “Г.Номуундарь арваннэгдүгээр сарын 30-ны өдөр өөрийн цахим хуудсаараа хүүхдүүдийн гэмт хэргийн талаарх мэдээллийг цацсан. Энэ нь өөрийнхөө нэр төрийг эрсдэлд оруулсан, зоригтой үйлдэл юм. Г.Номуундарийн ярьсан зүйлс олон нийт, нийгмийн анхаарлыг татаж байгаа. Охины эрүүл эсэхэд эргэлзэж байгаа мэт төөрөгдөл ч үүссэн. Г.Номуундарь охин сэтгэцийн хувьд эрүүл. Элсэлтийн шалгалтдаа өндөр оноо авч, их дээд сургуульд орсон байсан. Охиныг бичлэг хийсний дараа шинжилгээ хийсэн. Шинжилгээгээр охин ямар нэгэн мансууруулах бодис хэрэглэдэггүй нь тогтоогдсон.
Охины хууль ёсны эрхийг хамгаалж, түүний аав оны өмнө Монгол Улсын Ерөнхий прокурорт хандсан. Ц.Баасандоржоор ахлуулсан хуулийн баг охины хэрэг дээр ажиллаж байгаа. Харамсалтай нь, гэмт хэргийн нөхцөл байдал тогтоогдоогүй байхад хуулийн байгууллагууд асуудалд анхаарал, болгоомжгүй хандаж байна. Прокурорын байгууллагад эргэлзээ төрж байна. Уг нөхцөл байдалтай холбоотойгоор ташаа мэдээлэл өгч байна.
Цагдаагийн байгууллага хууль зөрчиж байна. Цагдаагийн албан хаагчид өмгөөлөгч нарыг гэрчийг байцаахдаа оролцуулахгүй байна. Гэрчүүдээс хуулийн дагуу үнэн зөв мэдээлэл авсан эсэхэд бид эргэлзэж байгаа. Мөн хэрэг шалгалтын ажиллагаа дөнгөж эхлэх гэж байхад хэрэгт холбогдсон этгээдүүдийг өмгөөлж, буруу ташаа мэдээлэл өгсөн УЕП-ын газрын Өлзийжаргал гэгч прокурорт хариуцлага тооцуулах гомдол гаргасан.
Ямар шалтгаанаар УЕП-ын хариуцлагатай албан тушаалтан хэт нэг талыг барьсан, гэмт этгээдүүдийг хаацайлсан үндэслэл муутай мэдээлэл тараасныг ойлгох боломжгүй бөгөөд эндээс прокурорын байгууллага энэ гэмт хэргийг үнэн зөвөөр, хараат бусаар шалгах эсэхэд эргэлзээ төрж байна. Ер нь хэрэгт холбогдогч хүүхдүүд мөнгөтэй, баян айлын хүүхдүүд байгаа учир Цагдаа, Прокурорт нөлөөлж байна уу гэх эргэлзээ төрж байна” гэлээ.
Г.Номуундарь охин худал мэдээлэл өгч, нийгмийг шуугиулсан уу гэсэн асуултанд өмгөөлөгч нь хариулав.
-Цагдаагийн байгууллага тодорхой ажил хийж эхэлсэн. Тухайлбал нэр бүхий 30 гаруй хүүхэд хар тамхи хэрэглэдэг гэдгийг тогтоосон. Мөрдөгчөөс авсан мэдээллээр нэр дурдагдсан хүүхдүүдийн дийлэнхи нь гадаадад байна. Монголд байгаа хүүхдүүдээс хар тамхины сорил авахад эхнээсээ хар тамхи илэрсэн тул Зөрчлийн тухай хуулиар зохих хариуцлага тооцсон байна.
Г. Номуундарь охины өмгөөлөгч О.Чулуунчимэг ярихдаа “Бичлэгт дурдагдсан орон байранд тухайн цаг хугацаанд бичлэгт нэр нь дурдагдсан хэрэгт холбогдсон хоёр этгээд байсан гэдэг нь тогтоогдсон гэв. Гэтэл цагдаагийн байгууллага энэ хоёр этгээдийг эрэн сурвалжлахгүй, хаана байгаа нь тогтоогдохгүй байна. Энэ хоёр этгээд оргон зугтсан байж болзошгүй байна. Өөрсдийгөө сошиалаар хэрэг хийгээгүй гээд тайлбар бичээд явуулж байдаг. “Би хэрэг хийгээгүй” гэсэн тайлбар бичсэнээрээ хэргээс мултарч болохгүй гэж өмгөөлөгч ярилаа.
Б.АМАРТҮВШИН
