Монголын дөрөв дэх тамирчин “Рио-2016” зуны олимпийн эрхийг авлаа. Тодруулбал, АНУ-д болж буй буудлагын “Дэлхийн цом”-ын тэмцээнд Г.Нандинзаяа дөрөвдүгээр байрт шалгарч, “Рио-2016” олимпод оролцох эрхтэй боллоо. Тэрбээр өнөө өглөө болсон хийн урт бууны эмэгтэйчүүдийн 10 метрийн дасгалд өрсөлдсөн юм. Дэлхийн шилдэг 106 тамирчин энэ дасгалд өрсөлдсөнөөс Сербийн буудагч, “Дэлхийн цом”-ын аварга Андре Арсович түрүүлж, Хорватын буудагч, олимп, дэлхийн медальт Шнезана Пежчич, Данийн тамирчин, Дэлхийн залуучуудын аварга Стейн Нилсен нар мөнгө, хүрэл медаль хүртсэн байна. “Дэлхийн цом”-ын хийн бууны дасгалд олимпийн 3 эрх өгч байгаа. Эхний гурван буудагч эрхээ авсан байсан тул 4, 5, 6-р байрт орсон Монгол, АНУ, Египетийн тамирчид ийнхүү олимпийн эрхтэй болж байна.
Ганхуягийн Нандинзаяа нь Оюутны дэлхийн аварга, оюутны “Универсиад” наадмын хүрэл медальт, энэ жил 21 нас хүрч буй залуу тамирчин юм.