Энэ жилийн “Балдорж”-ын шагнал гардуулах ёслол дээр шүүгчээр ажилласан Г.Аюурзана бусад шүүгч нараа төлөөлөн шүүлтийн талаар болон сэтгүүл зүйн чиг хандлага хэрхэн өөрчлөгдөж байгаа талаар үг хэлсэн юм. Тэрбээр:“Би сүүлийн таван жилийн турш шүүгчдийн бүрэлдэхүүнд орон ажиллалаа. Энэ жил 9 хүний бүрэлдэхүүнтэй шүүхийн зөвлөл нэг жилийн турш ажиллалаа. Энэ жилийн “Балдорж” шагналын шалгаруулалт маш онцлогтой байсан. Өмнөх шалгаруулалтуудад харагдаж байгаагүй нэг сонин зүйл сүүлийн нэг жилд гарлаа. Энэ бол цуврал нийтлэл юм. Манай сэтгүүлчид сүүлийн нэг жил цуврал нийтлэлээр гаршиж байна. Бүтэн жилийн турш Л.Ганчимэг, Болормаа хоёр “Ногоон хотын эрэлд” гэдэг цуврал нийтлэл бичсэн. Ц.Цэвээнхэрлэн гэхэд Урт нэртэй хуулийг цуцалсан тухайд байгальд ямар хүйтэн сэтгэлээр хандаж байгаа талаар бичсэн. Мөн эмнэлэг тойрсон цуврал нийтлэлүүдийг нэрлэж болно. Энэ нь манай сэтгүүлчид нэг удаагийн мэдээ, сурвалжлага бичээд орхидгоо больж байна гэсэн үг. Эхэлж олсон сэжүүрээ сэтгүүлч хүн эцсийг нь хүртэл мөрддөг, бүх юмыг мухарладаг ийм мундаг сэтгүүлзүй төлөвшиж байна гэж бодож байна.
Түүнээс гадна дэлхий даяараа цаасан сониноос татгалзаж байна. Цаасан сонин бол дор хаяж арван хэдэн цагийн алдагдал хүлээдэг байхад одоо онлайн бол шууд цацдаг болсон. Энэ утгаараа сайтын сэтгүүл зүй зөвхөн copy, past биш өөрийн гэсэн сурвалжлагатай болж сэтгүүлзүйн чиг хандлагыг дагаж байна. Гэх мэтээр нэг чиглэлээр мөрдөөд дагаад бичиж байгаа сэтгүүл зүй бол хүчирхэг болж байгаагийн хэмжүүр юм болов уу хэмээн бодож байна” гэв.
О.ӨНӨР