Жүдо бөхийн ДАШТ Японы Токио хотноо 5 дахь өдрөө үргэлжилж байна. Өнөөдөр эрэгтэйчүүдийн 90 кг, эмэгтэйчүүдийн 70 кг-ийн жингийн барилдаанууд болсон бөгөөд манай бөхчүүдээс ОУХМ Гантулгын Алтанбагана, залуу тамирчин Цэрэндуламын Энхчимэг нар барилдлаа. Анх удаа ДАШТ-д өрсөлдөж буй 18 настай Ц.Энхчимэгийн хувьд эхний тойрогт Португалын Барбара Тимод цэвэр ялагдсанаар тэмцээнээ дуусгалаа.
70 кг-ийн жинд дэлхийн хошой аварга, Японы Чизүрү Араи “А” хэсгийг тэргүүлэн барилдаж байгаа бол Австрийн Микаэла Поллэрэс, өнгөрсөн оны ДАШТ-ий мөнгөн медальт Мариэ Эвэ Гаиэ, Абу Дабигийн их дуулгын аварга Шведийн Анна Бернхолм нар бусад хэсгийг тэргүүлэн барилдаж байна. Харин 2018 оны Азийн наадмын мөнгөн медальт, Анталягийн гранпригийн аварга, ОУХМ Г.Алтанбагана эхний тойрогт Италийн Николас Мунгайтай хүч үзсэн ч нэмэлт үед ялагдлаа. Хэсгийн барилдаан өглөө Монголын цагаар 11:00 цагт эхэлсэн бол шигшээ барилдаан уламжлал ёсоор 18:00 цагт эхэлнэ.