“Оскар”-ын шагнал гардуулах ёслолын ажиллагааны үдэш Фрэнсис МакДорманд алтан хүн шагналаа хулгайд алдсан талаар CNN агентлаг мэдээлжээ. МакДормандын төлөөлөгч CNN-д мэдээлэхдээ “Шагнал гардуулах ёслолын дараа түүний шагналыг нэг хүн авч явсан. Гэвч удалгүй шагнал эзэндээ буцаж ирсэн” хэмээн хэлсэн байна.
Лос Анжелесийн цагдаагийн газраас мэдээлснээр, ням гаригийн үдэш 47 настай нэгэн эрийг “Оскар”-ын шагнал хулгайлсан хэргээр баривчилжээ. Гэхдээ тус шагнал МакДормандынх гэдгийг батлаагүй байна.
Жүжигчин бүсгүй өмнө нь 1997 онд “Fargo”-д тоглож, “Академи Эвардс”-ын шилдэг эмэгтэй жүжигчнээр шалгарч байв. МакДорманд хоёр дахь “Оскар”-ын шагналаа өнгөрсөн ням гаригт “Three Billboards Outside Ebbing, Missouri” драмаараа хүртсэн билээ.