АНУ-ын Сенатын Хууль зүйн байнгын хороо онлайн орчин дахь хүүхдийн аюулгүй байдлын асуудлаар нийтийн сонсгол зохион байгуулав.
Нэлээд ширүүн уур амьсгалтай болж өнгөрсөн уг сонсголд “Meta”, “Snap”, “Discord”, “X”, “TikTok” гэсэн таван компанийн гүйцэтгэх захирлууд оролцжээ. Мөн уг сонсголд сошиал платформын нөлөөгөөр амиа алдсан болон эрүүл мэндээрээ хохирсон хүүхдүүдийн эцэг эхчүүдийн төлөөлөл оролцож байжээ. Тэд гартаа хүүхдүүдийнхээ гэрэл зургийг барьсан байв. Сонсголын үеэр Бүгд найрамдах намын сенатор Жош Хаули хохирогч хүүхдүүдийн эцэг эхчүүдийн нүүр рүү харж байгаад уучлал гуйхыг Зукербергээс шаардсан байна. Хаули “Таны бүтээгдэхүүн хүүхдүүдийг алж байна” гэж хэлээд яг одоо тэдний эцэг, эхээс уучлал гуйх боломжтой эсэхийг залуу тэрбумтнаас асуужээ.
Зукерберг суудлаасаа босч, эцэг эхчүүдийн төлөөлөл рүү харж зогсоод “Та бүгдийн амссан зовлон зүдгүүрийг өөр хэн ч дахин туулах ёсгүй. Бид энэ ажилд их мөнгө зарцуулж байгаа ч би та бүхнээс уучлал гуйж байна” гэж хэлжээ.
Энэхүү сонсголд оролцсон Сенатын гишүүдийн олонх нь сошиал медиа компаниудын хуулийн зохицуулалтын орчныг чангатгаж, хүүхдийн садар самуун, хүчирхийллийг сурталчилсан агуулгатай материалыг платформоороо тараасан тохиолдолд хатуу хариуцлага хүлээдэг болгох хууль батална гэж амласан байна.